Претходен број

5 прашања

Ќе го поддржиме Бошкоски за претседател

Марјан Додовски, потпретседател на ВМРО-НП

Жаклина Хаџи-Зафирова


Г-не Додовски, се подготвувате ли како партија за претстојните локални и претседателски избори, бидејќи се' поевидентна е Вашата поддршка на Љубе Бошкоски на неговите јавни настапи на неговото здружение ОДАМ?

За настапот и поддршката на претстојните избори ќе дискутираме во текот на јануари. Бошкоски води една кампања за комуникација со граѓаните во земјава и искажување на неговите размислувања и, во најблага форма речено, се очекува и негово кандидирање за претседател на државата. Во таква насока е и здружението што го формираше, иако се' уште нема јавен став дека ќе се кандидира. Се' поизвесно е дека многу тешко ќе ја добие поддршката од ВМРО-ДПМНЕ. Но, без разлика на тоа дали Бошкоски ќе формира партија или не, дали ќе оди како независен кандидат, нашите ставови ќе бидат во согласност со нашата програма. Отворени сме за соработка. Ако тој се кандидира за претседател, ако нема друга опција, сигурно би го поддржале Бошкоски на изборите, меѓутоа за тоа ќе треба да одлучат партиските тела.


Кои беа причините за смена на претседателот на партијата Ѓорѓи Трендафилов, кого го исклучивте и од членството?

Во изминатата година и неколку месеци претходно партијата беше ставена во позиција на исчекување дали нејзиниот претседател сака и дали ќе почне да работи. По Конгресот на ВМРО-Народна во април 2007 година кога Трендафилов беше избран за претседател, имаше многу кратка активност од негова страна. Членството беше подготвено за работа и сакаше да се впушти во силна партиска активност, но неактивноста на Трендафилов доведе до ваква состојба. Тој, буквално, ја стави партијата во позиција да нема ни оформени тела. Не го свикуваше Централниот комитет, не се започна процесот на поставување претседатели на општинските комитети. Нашите членови беа навистина дезориентирани. Но, од Трендафилов немаше никакви сигнали и активност. Како да се изгуби. Не можевме да го пронајдеме ниту на телефон. Цела година се обидувавме да го разубедиме, но неговата пасивност, неодговорност, неактивност доведе до тоа да го исклучиме од партијата.

Како ја објаснувате апатичноста на Трендафилов?

Не успеавме да дојдеме до објаснување. Од негова страна немаше одговор за неактивното однесување кое беше евидентно, бидејќи како лидер само десетина пати се појави во партијата. Штетата нанесена на партијата е видлива со оглед на фактот што не излеговме на предвремените парламентарни избори. Листата која тогаш Трендафилов ја поднесе до ДИК беше негова приватна и воопшто не бевме консултирани за неа. Таа беше подготвена во последните 24 часа пред рокот за поднесување листи.

Колкав е одливот од членството? Колку се точни тврдењата на поранешната в.д. претседателка Весна Јаневска дека по нејзиното заминување, околу 300 ваши члена поминале во ВМРО-ДПМНЕ и дека на последните избори за нив гласале 30.000 ваши члена?

Во изминатите две недели работна група од партијата имаше средби со членството. Најголем дел од членството е тука. Познато е дека мал број наши членови од најразлични причини преминаа во ВМРО-ДПМНЕ. Најголем дел од тие луѓе повторно се јавуваат со желба да се вратат назад. Во партијата на Груевски преминаа петмина или шестмина раководители на општински комитети. Нашите членови преминуваат поради силен притисок на работните места, а некои поради одредени социјални и економски параметри. Точно е и дека дел од членовите на ВМРО-Народна на последните парламентарни избори гласаа за ВМРО-ДПМНЕ. Како што е и точно и тоа дека да не беа тие гласови на ВМРО-Народна, партијата на Груевски немаше да го помине прагот од 61 пратеник, туку ќе паднеше на 53, 54 или 55 места според Донтовиот модел. Дел од членството, исто така, не излезе на парламентарните избори, додека други ги пречкртуваа ливчињата. Секој гласаше во согласност со своето убедување, бидејќи немаше сигнал од партијата.


Во кои градови конкретно се чувствува нефункционирањето на партиските тела?

Има градови каде што и покрај тоа што партијата не беше функционална речиси две години, сепак, подобро стоиме од ВМРО-ДПМНЕ, како што се Охрид, Тетово, Петровец, Македонска Каменица и Делчево. Таму каде што неактивноста на Трендафилов беше многу силна, ВМРО-ДПМНЕ најде солидна почва да врши силен притисок врз членовите и затоа бевме доведени во позиција да градиме партиска структура. Во текот на декември очекуваме да го заокружиме процесот на поставување претседатели на комитети на целата територија.