Вработените во „Леов компани“ во одбрана на газдата
ПРИЛЕП - Раководството на прилепскиот погон на велешката фабрика „Леов компани“ застана во одбрана на газдата Трајче Леов. Прилепските менаџери посочија дека од доаѓањето на Леов, фабриката бележи развој, а 150-те вработени добиваат секој месец плати и придонеси.
Но, менаџерите не соопштија ниту еден аргумент со кој ќе ги демантираат наводите на МВР, според кои Леов и претседателот на УО на „Пролукс“, Димитрија Стојаноски, пред три години потпишале купопродажбен договор со кој ги оштетиле доверителите за околу 600.000 евра. Полицијата побара притвор за двајцата осомничени, но истражното одделение на Основниот суд одлучи да спроведе редовна истражна постапка.
Менаџерот Венцислав Крстески на прес-конференција обвини дека одредени структури имаат намера да вршат опструкција врз работата на фирмата и побара тие јавно да се декларираат.
„Сметаме дека некој врши опструкција, го кочи развојот на фирмата и апелираме тој што го прави тоа да излезе и јавно да каже во што е проблемот“, изјави Крстески. (Мн.Т.)
|
