Избрани добитниците на наградата „13 Ноември“

Градот ги избра годинешните добитници на наградата „13 Ноември“. Наградени ќе бидат фестивалот „Златно славејче“ за долгогодишната културна и уметничка активност и уште осум поединци, потоа Дејан Лилиќ за остварувања во областа на театарот, професор Димитар Ќорнаков за монографиите „Македонски манастири“, „Царски двери“ и „Македонска резба“, како и професор Зорица Каракутовска за постигнати резултати од областа на образованието и воспитувањето. За долгогодишна научноистражувачка дејност во областа на здравството е награден професор Илија Џонов, професор Љупчо Ајдински за постигнати резултати во хуманитарната дејност, а Јордан Цеков-Дане за монографијата „Како беше ослободено Скопје“. Наградата „13 Ноември“ ќе ја добие и Мирче Јанушевски од областа на ученичкиот спорт, како и Сашка Грујовска од гимназијата „Георги Димитров“ за континуиран одличен успех и постигнати резултати на натпревари по математика и по физика. Годинава наградата во категоријата странски државјанин што остварил придонес во државава за развојот на едукацијата во областа на социјалната работа и менталното здравје ќе му биде доделена на професор Гертрауд Милер од Германија. (Дс.Т.)