Возачот на Тоше остава судот да му ја реши судбината

Ѓорги Ѓорѓиевски низ солзи рече дека по смртта на својот најдобар другар, му останала само заедничката фотографија

Љубиша Станковиќ


„Жалам за она што се случи. Го изгубив најдобриот другар и пријател“, рече вчера Ѓорги Ѓорѓиевски, возачот на „туарегот“ во кој пред речиси три години загина македонската музичка ѕвезда Тодор Проески. Задушувајќи се во солзи, тој рече дека од својот најдобар другар му останала само една заедничка фотографија, која ја покажа во судницата, и остави на судот да одлучи за неговата судбина.

По три одложувања во Апелациониот суд во Скопје, вчера се одржа Јавна седница по жалба на пресудата со којашто скопскиот Кривичен суд го осуди Ѓорги Ѓорѓиевски на казна затвор во траење од две години за несреќата што се случи на 16 октомври 2007 година, кога во близина на Нова Градишка загина Проески.

Седницата започна со читање на првостепената пресуда, која беше изречена на 21 октомври 2009 година, на која и одбраната и Јавното обвинителство вложија жалба по однос на висината на казната.

Образложувајќи ја својата жалба, Силвија Џилвиџиева, адвокатка на возачот Ѓоргиевски, говореше за направени повреди во постапката, нагласувајќи дека согласно со хрватскиот Закон за сообраќај на патиштата, во вакви случаи, се изрекува многу поблага казна, којашто се оправдува со болката и повредите што му се нанесени и на обвинетиот. Таа побара, доколку првостепената пресуда не биде укината, обвинетиот да биде ослободен или да му се изрече алтернативна казна.

Според Џилвиџиева, Ѓорѓиевски цели шест години катадневно другарувал со Проески, а кога разбрал што се случило со него, уште кога била на лекување во Нова Градишка, се обидел да си го одземе животот. Адвокатката рече дека агонијата на обвинетиот трае речиси три години и дека тој подолго време е на лекување на Психијатриската клиника во Скопје.

Јавниот обвинител Коле Штерјов му сугерираше на Судскиот совет да биде одбиена жалбата на одбраната. За него пресудата ниту не е нејасна ниту е неразбирлива. Тој побара пресудата да не биде укината, бидејќи во иднина тоа ќе претставува репер на кои ќе се повикуваат странки, во некои идни вакви случаи.

Претседателот на Судскиот совет, судијата Исмаил Лимани, рече дека одлуката ќе биде донесена во законски предвидениот рок.

Ѓорги Ѓоргевски, како возач на „туарег“, во којшто освен трагично загинатиот Тоше Проески беше и неговата менаџерка Лилјана Петровиќ, беше обвинет за сообраќајната несреќа на автопатот Белград - Загреб.