Оружен инцидент во скопски Грчец

Едно лице е рането, а уште двајца се повредени во инцидент што се случи вчера околу 11,20 часот во скопското село Грчец. Саботните недоразбирања биле причина за нова пресметка меѓу десетина лица од Грчец, поделени во две групи, соопшти полицијата. Ривалските групи најпрво почнале вербално да се расправаат, па да се тепаат, при што со тврд предмет по глава бил удрен 36-годишен жител на селото, додека 18-годишно момче од клоците и тупаниците се здобило со телесни повреди. Според полицијата, во еден момент, 24-годишниот И.М. од Грчец извадил пиштол и ранил 53-годишен соселанец, кој е префрлен во Ургентниот центар. Осомничениот И.М. заедно со уште две-три лица, кои биле со него, побегнал и полицијата трага по нив.

Приведени биле неколку лица и отворена е истрага, која треба целосно да го расчисти случајот, по што ќе следуваат пријави. (Г.А.)