Претходен број

Охридско на шесто место за седум светски чуда

Охрид - Охридското Езеро е на шесто место во вториот круг на Интернет-гласањето за избор на нови 7 светски чуда на природата, кое завршува на 7 јули. Доколку граѓаните продолжат да го даваат својот глас, тогаш во вториот круг може да влезе и вториот предлог, пештерата „Врело“, која е на 13. место. На почетокот во изборот имаше 440 предлози, за кои досега гласале над милијарда луѓе во светот.

Од Македонскиот официјален комитет за номинирање велат дека Охридското Езеро сигурно ќе биде меѓу 77 кандидати во 11 категории во вториот круг и оти ќе обезбеди поддршка од независната комисија за избор на финалисти, на чие чело е поранешниот генерален секретар на УНЕСКО, Федерико Мајор. Неофицијално дознаваме дека се водат преговори Федерико Мајор, човекот во чие време Охрид беше ставен на листата на УНЕСКО како заштитено светско културно и природно наследство, да биде гостин на фестивалот „Охридско лето“.

„Доколку Охридското Езеро влезе во финалето, тоа е одлична можност цел свет да дознае за Република Македонија и за убавините кои ги имаме. Конечно, тоа ќе крене многу позитивен прав и ќе донесе многу туристи. За сите 21 финалист номинирани во тој посебен круг ќе се етаблира една светска туристичка тура во која целата комисија ќе оди низ избраните места и ќе прави репортажи“, вели д-р Зоран Тунтев, член на Македонскиот официјален комитет за номинација. (С.И.)