На државен трошок лекување во Турција

Нашиот Фонд за здравство од турската болница „Аџибадем“ побарал понуда со цени за здравствени услуги што не се вршат во земјава

Јасмина Јовановска


За здравствени услуги и тераписки третмани што не се вршат во земјава, Фондот за здравствено осигурување планира македонските пациенти да ги испраќа на лекување во приватната турската болница „Аџибадем“ во Истанбул. До менаџментот на оваа болница, од македонскиот здравствен фонд пред неколку дена е стигнат допис, со кој од „Аџибадем“ се бара понуда по која цена ќе ги лекуваат македонските пациенти.

На лекување во Турција македонскиот фонд планира да ги праќа пациентите за операции на отворено срце на деца, одредени кардиохируршки операции на возрасни, оперативно лекување на ретинопатија кај децата, неурохируршко лекување на разни видови емболии, односно анверзии во главата, како и за одредени современи онколошки третмани што не се вршат во Македонија.

„Аџибадем“ има искуство во соработка со државни фондови за здравствено осигурување. „При склучување на договорите, странските пациенти се лекуваат за половина цена од редовните цени во нашата болница“, истакна заменик-директорот на турската болница, Јалчин Нак. Но, секако, оваа соработка ќе се реализира преку нивниот македонски партнер, клиничката болница „Систина“, која како што објасни Јалчин, на пациентите ќе им дијагностицира од што боледуваат, а во „Аџибадем“ ќе одат само за треман или лекување. „По завршувањето на интервенцијата или терапијата, ’Систина‘ ќе има обврска да ги следи болните и да им прави контроли“, вели Јалчин.

Досега „Аџибадем“ има склучено договори со повеќе државни фондови од регионот, како, на пример, со оние од Србија, Албанија, Косово, БиХ, Бугарија. Српските пациенти во оваа болница доаѓаат за кардиохируршки операции зашто листите на чекање за овие интервенции во Србија се долги и се чека и по три години за операција.

„Во Аџибадем дојдов затоа што кај нас не можев да дојдам на ред. Две години бев на листа на чекање на Дедиње и одлучив да дојдам овде, бидејќи Фондот ми ги плаќа сите трошоци“, ни изјави српски пациент од Вршац, кој по три бајпаса на срцето, закрепнуваше во турската болница.

За ист здравствен проблем во „Аџибадем“ дошол и Златко Мандиќ од Ниш. „Во 2008 година имав инфаркт на миокардот, и за две години ми вградија шест стента, но не помогнаа, па морав да се оперирам. Операцијата во Аџибадем ми ја плати нашиот Фонд за здравствено осигурување, а поради многуте болни, во Србија се формираат листи на чекање. Мојата операција мораше итно да се изврши за да останам жив. Ми направија три бајпаса. Ако чекав на листата, на ред за операција ќе дојдов дури на 13 март 2013 година“, ни објасни оперираниот пациент.

Редовната цена на бајпас-операција во „Аџибадем“ е околу 9.000 евра, но за српските пациенти таа изнесува 4.700 евра, а во оваа цена е вклучен авионски превоз, придружба, како и подготовка за операција и интервенцијата. „Годишно се прават по околу 2.500 операции на отворено срце на странски болни“, вели професорот Џем Алма, кој додава дека пациентите однадвор се потешки случаи и кај нив се прават и покомплицирани операции.

За една година се оперирани 118 пациенти од Србија и стапката на смртност е нула, односно е починат само еден болен. „Постои очекувана и реализирана стапка на смртност. Во нашиот центар очекуваната е 3,2 отсто, а реализираната е 0,9 отсто“, истакна проф. Алма, кој во неговата досегашна кариера како кардиохирург оперирал околу 20.000 пациенти.

Освен кардиохирургија според современи стандарди, во„Аџибадем“ и сите други интервенции се вршат со најсовремена апаратура. Оваа медицинска групација располага со петскен систем за откривање и на најнедостапниот канцер, потоа компјутерска томографија и магнетна резонанца со најмал ризик за зрачење, со што со голема прецизност се зрачи туморот, но не и здравото ткиво. Болницата поседува и зрачен апарат „сајбер кнајф“ со кој се третираат неоперативни и тешко достапни тумори, посебно оние на главата и со многу мали димензии. „Аџибадем“ го има и роботот „да винчи“ со кој пациентот се оперира без да го допира лекар, и е наменет за гинеколошки, уролошки, кардиолошки и васкуларни интервенции што се вршат лапараскопски без класично сечење.