Поглед

Партиска биографија

Деспина Трајковска

„Член на ВМРО-ДПМНЕ од памтивек, без неоправдани часови на сите минтизи на партијата, лепач на партиски плакати - се подразбира, омилена боја - портокалова, младоста - предност...“ Се чини, токму ваква биографија е гаранција за просперитет во денешно време, независно од стручноста и компетентноста што би требало да се на прво место за искачување по скалилата што ги меркате.

Колку и да звучи збунувачки (ама дефинитивно не е кога критериумите во секој поглед и на секој чекор се испоместени), партиската боја гарантирано отвора виза за работно место, дури и на два стола, па дури и за едно навидум обично членство во управен или надзорен одбор во некоја од јавните институции.

Дефинитивен доказ за тоа се предлозите на градоначалникот на Скопје, Коце Трајановски, за нови надзори во една градинка, училиште, во Универзална сала. Ако на лице што очигледно нема допирни точки со воспитно-образовната дејност бидејќи по струка е хемиски техничар, му се доверува со својот глас да влијае во функционирањето на една градинка, се поставува прашањето што ли останува за компетентноста на раководните лица на останатите позиции (чест на исклучоци). Истовремено, стравотна, но и мизерна помисла за еден „обичен“ дипломиран граѓанин. Дојде време човек да не може да се крсти ниту во филтерите позиционирани да одлучуваат „за“ или „против“ именувањата, оти портокаловата боја во случајов го „заслепува“ и градскиот Совет.

Се чини, ни денес ни утре, а поинаку не беше и за време кога модерна беше сино-жолтата боја, нема да има место за „обичните“ граѓани. Ако партизацијата веќе стаса и во градинките, дефинитивно, некој треба да алармира да се заборават членските книшки уште во јасли.