„Масив атак“ во Скопје на 16 јули

Легендарната британска трип-хоп група „Масив атак“ ќе настапи во Скопје на 16 јули, како хедлајнери на фестивалот „Скопје гори“, во организација на „Авалон продукција“. Како што веќе пишуваше „Утрински весник“, кој прв ја објави веста за гостувањето на познатите музичари, бендот ќе допатува во Скопје во склоп на големата турнеја во чии рамки го промовира албумот „Heligoland“, издаден оваа година, по седумгодишна дискографска пауза.

Концертот ќе се одржи на скопско Кале, местото на кое на 20 јуни ќе настапи и Били Ајдол. „Масив атак“ ќе пристигнат во земјава од Софија, каде што имаат концерт на 15 јули, додека останатите детали за нивното гостување ќе бидат обелоденети на прес-конференција што ќе се одржи на 22 јуни. (К.Ш.)