Евтини кредити дури по еден месец

Кон крајот на септември ќе бидат достапни заемите за компаниите

Соња Маџовска



Банкарите и Македонската банка за поддршка на развојот ги испеглаа условите за евтини кредити од кредитната линија на Европската инвестициона банка, вредна 100 милиони евра. Премиерот Никола Груевски, а и банкарите, потврдуваат дека до крајот на неделава ќе бидат потпишани договорите меѓу банките и МБПР. Сепак, од банките велат дека она за што е преговарано и вметнато во договорот по барање на трите најголеми банки, деновиве треба прво да го одобрат нивните интерни комисии за процени на ризикот.

Груевски уверува дека евтините кредити ќе им бидат достапни на фирмите кон крајот на септември. „Министерот за финансии, Зоран Ставрески, ме информираше дека деновиве имал состанок со банкарите и оти конечно ги расчистиле сите дилеми што ги имале околу пласирањето на овие 100 милиони евра, така што денес, утре или најдоцна задутре би требало да се потпишат договорите меѓу МБПР и комерцијалните банки, по што може да почне користењето на тие кредити. Очекуваме дека до крајот на септември ќе се повлечат првите кредити. Штом ќе се потпишат договорите со МБПР, потоа остануваат само банкарските процедури што секоја банка ги бара кога одобрува кредит за некоја фирма. Можам да кажам дека сите прашања што беа ненадминати, сега се надминати“, изјави вчера Груевски.

А што е тоа поради што доцнат овие кредити веќе еден месец и што побараа трите најголеми банки да се внесе во договорот за да го прифатат?Банките во преговорите со МБПР, велат извори за „Утрински весник“, само го гледале својот интерес и ризикот кој треба да го понесат при одобрувањето на овие заеми.

Неофицијално, се преговарало на три пункта, односно каматните стапки, колкаво да биде учеството на банките од нивните сопствени средства, а колкаво она од кредитната линија на ЕИБ, а на маса било ставено и прашањето дали кредитите ќе бидат денарски или девизни. Банкарите не ги откриваат деталите што им прифатила Владата додека официјално не ги потпишат договорите со МБПР, но неофицијално имало барање од страна на банкарите само во првата година од отплатата на кредитите да важи каматата од шест отсто, а потоа таа да се поместува. Што се однесува до учеството на банките од нивните сопствени средства, банките барале наместо 50-50 отсто учествувањето на банките да се помести на 25 отсто, додека поголемиот дел, односно 75 проценти од кредитите, да бидат со средства од ЕИБ.

Што од сето ова прифатила Владата ќе се обелодени официјално до крајот на неделава, но банките прифатиле да ги потпишат договорите по еден месец преговори. Трите најголеми банки, главно, преговарале за да се искристализираат условите со МБПР, односно Владата.

Инаку, уште пред еден месец МБПР ги испрати првичните договори до седум банки што беа избрани од ЕИБ, односно Комерцијална банка, Стопанска банка, Стопан��ка банка-Битола, Прокредит, Инвест банка, НЛБ Тутунска банка и Охридска банка.

Парите од ЕИБ ќе легнуваат на сметките на банките и тоа во неколку транши. За да тргне првата транша, услов е вкупната сума на одобрени кредитни барања да не е помала од три милиони евра.