Преносливоста на броеви успешна

Услугата „Преносливост на броеви“ од комерцијалниот почеток на 1 септември минатата година до вчера ја искористиле 12.449 корисници во фиксната телефонија и 3.972 од мобилната телефонија, чии линии се' уште се активни.

Како што истакна портпаролот на Агенцијата за електронски комуникации Марјан Пејовски на денешната прес-конференција, со тоа Македонија многу побрзо од европската практика во фиксната телефонија го постигнала просекот од 2,75 отсто пренесени броеви од доминантниот на алтернативните фиксни оператори.

„Во Европа бројот од 2,75 отсто пренесени броеви се постигнува за околу четири години, а кај нас тоа се случи само за една година со што услугата ’Преносливост на броеви‘ се покажа како успешна приказна“, рече Пејовски и додаде дека услугата директно влијае на конкуренцијата и либерализацијата на пазарот, а индиректно на подобрување на услугите на фиксните и мобилните оператори.

Тој посочи дека со интервенциите на АЕК, во февруари годинава се намали временската рамка за преносливост на број од 14 на седум дена од поднесувањето на барањето на корисникот, а во јуни, како што кажа, е донесена одлука со која максималната висина на еднократниот надоместок за услугата е утврдена на 200 денари без ДДВ по пренесен број или подредена серија броеви по мрежна завршна точка. (МИА)