Колку ќе расте македонската економија во 2009?
Според Виенскиот институт, во земјава БДП в година ќе оствари економски раст од 3 проценти
Нина Нинеска-Фиданоска
Нови и далеку попесимистички прогнози за тоа како ќе расте македонската економија во наредниот период пристигнаа деновиве од Виенскиот економски институт. Според предвидувањата на овој реномиран институт, во 2009 година бруто-домашниот производ во земјава се очекува да порасне за само 3 проценти, наспроти владините се' уште непроменливи прогнози дека македонската економија в година ќе оствари раст од дури 5,5 проценти, на кои го темели и буџетот за идната година.
Македонскиот премиер Никола Груевски во своето последно телевизиско интервју, прашан околу забелешките за големината на буџетот од дури 2,7 милијарди евра за 2009 година, коментираше дека ниту тој како премиер ниту Владата не ја одредува сама големината на буџетот, туку таа зависи од растот на економијата, врз основа на кој се планираат даноците што ќе се приберат во националната каса.
Во својот извештај, објавен на 27 ноември, Виенскиот економски институт предвидува дека годинава македонската економија ќе ја заврши со раст од 4 проценти, додека во 2009 година таа ќе има раст од три проценти, а исто толкав економски пораст се предвидува и за 2010 година.
Значи, институтот за 2009 ни прогнозира раст од три отсто, што е досега најнеповолна проекција од сите меѓународни институции што се занимаваат со оваа проблематика.
Претходно, Меѓународниот монетарен фонд излезе со прогноза дека економијата на Македонија идната година ќе има раст од пет проценти. Европската банка за обнова и развој, пак, деновиве излезе со прогноза дека во 2009 македонската економија ќе има раст од 4,7 отсто, а малку претходно, во извештајот на Европската унија, беше наведено дека земјава ќе има раст во 2009 година од 4,5 проценти. Но, најпесимистичка е прогнозата на Виенскиот институт, која предвидува раст од три отсто. Овие понеповолни предвидувања меѓународните институции и експерти ги објаснуваат со падот на македонскиот извоз и на производството, кое во октомври падна за 10 отсто во однос на истиот месец минатата година.
Нашата Влада, пак, упорно стои на ставот дека македонската економија в година ќе оствари раст од 5,5 отсто, што сепак е малку поублажена проекција од онаа што ја имаше претходно, дека ќе има раст од 6 отсто. „Проекциите за економскиот раст е дека тој во2009 година ќе биде околу 5,5 проценти. Растот ќе биде онолку колку што приватниот сектор ќе успее да оствари, а ќе зависи и од капиталните инвестиции на државата“, рече на вчерашната прес-конференција вицепремиерот Зоран Ставрески. Тој смета дека мерките што ги предлага Владата ќе му помогнат на стопанството да реализира висок раст.
Инаку, во извештајот на Виенскиот институт е наведено дека регионот на Централна, Источна и Југоисточна Европа не остана непогоден од влошената глобална средина и ќе се соочи со забележлив застој на економскиот развој, но не и рецесија, како во еврозоната или во САД. Развојот во новите земји-членки на ЕУ ќе опадне од просечните 6,3 отсто во 2007 година на 5 проценти во 2008 и 2,7 отсто во 2009 година. За 2010 година, оптимистичкото сценарио предвидува скромно закрепнување до 3,5 отсто. Во Југоисточна Европа, за 2009 година се очекува просечен развој од 3 отсто. Забележливиот застој во развојот е последица на силното паѓање на побарувачката за извоз од регионот, на застојот или дури паѓањето на инвестициите и прелевањето на меѓународната финансиска криза, која драстично ја намали достапноста на кредити. Невработеноста во 2009 година привремено ќе се зголеми во повеќето земји од регионот. Тие се главните заклучоци од најновите предвидувања на Виенскиот институт за меѓународни економски студии.
|
