Сиромашните, конечно, го добија првиот СОС-маркет

Право на поевтини производи ќе имаат само оние што ќе добијат картички, како доказ дека се социјалци; првата СОС-продавница е на „СП маркет“

Со задоцнување и по неколку најави, сиромашните од земјава, конечно, го добија првиот СОС-маркет. Над 15 илјади најзагрозени граѓани од Скопје од завчера веќе можат да купуваат во првоотворената СОС-продавница, по цени што се пониски од 20 до 25 отсто од пазарните. Кај прехранбените производи попустот ќе биде до 20-ина проценти, а кај средствата за лична хигиена до 25 отсто.

Право на поевтини производи ќе имаат само оние граѓани што ќе добијат картички од социјалните центри, како доказ дека живеат од социјална помош. Притоа, секој од нив ќе може да потроши во продавниците толку колку што прима како социјална помош, но не повеќе од 5.000 денари во текот на еден месец. Завчера им беа поделени специјалните картички на најзагрозените случаи. Оваа бенефиција да купуваат поевтини производи засега ќе ја имаат само социјалците од главниот град на државава.

Првиот СОС-маркет што беше отворен е на „Скопски пазар“ во Кисела Вода. Предвидено е наскоро сиромашните да можат да купуваат по пониски цени и во неколку други СП-маркети, а за таа намена наскоро ќе бидат приспособени и неколку маркети на „Тинекс“.

Според објаснувањето од овие трговски синџири, пониските цени за производите ги обезбедиле откажувајќи се од трговската маржа. Имено, фирмите што ја нудат оваа помош не добиваат ништо во замена, освен што си го зголемуваат реномето и угледот кај граѓаните. Но, фирмите не кријат д��ка за возврат, сепак, очекуваат помош од Владата.

Првите картички ги поделија министерот за финансии, Зоран Ставрески, и министерот за труд и социјална политика, Џељаљ Бајрами.

Ставрески ја поздрави иницијативата на „СП маркет“ и на „Тинекс“. „Сметам дека двете фирми на ваков начин покажаа солидарност со посиромашните слоеви на населението во вакви тешки услови на криза“, рече Ставрески. Тој најави дека Владата наскоро ќе разговара со стопанските комори за да се вклучат поголем број компании во проектот.

Министерот Бајрами вели дека наскоро ќе бидат отворени вакви маркети и во другите градови во Македонија. Според него, биле набавени доволен број картички, кои ќе се издаваат преку Центарот за социјална работа. „Процедурата за добивање на картичките е многу едноставна. Единствено што треба да го направат социјалците е да појдат во центрите за социјални работи, каде што ќе им бидат издадени. Потоа, заедно со документ за идентификација, ќе треба да ги приложат при пазарењето“, рече Бајрами.

Правата картичка му беше доделена на Димче Крстев, кој изјави дека оваа е еден од најважните проекти за социјалните случаи.

Инаку, отворањето на социјалните продавници во почетокот на годинава го предложи опозициската СДСМ. Премиерот Груевски најпрвин изјави дека идејата е неизводлива, но пред неколку месеци Владата, сепак, го прифати проектот. (Н.Н.Ф.)