Тутунарите се заканија дека ќе палат и ќе кршат

Не се отстапува од барањето за повисока откупна цена

Маја Томиќ


Мора да се најде решение за проблемот со тутунот, преку формирање една иста цена, побараа тутунарите на вчерашниот протест пред Собранието. Тие сметаат дека цената не мора да биде како ланската, но не се согласуваат ниту со цена од 80 денари по килограм тутун, колку што сега им се нуди. Потсетија дека оваа година тутунот е далеку поквалитетен од ланскиот и дека воопшто не е проценет со соодветната цена.

„Главното наше барање е да ни го платат тутунот, но да биде 175 денари или дури и 162 денари, а не како сегашната цена од најмногу 95 денари во просек“, изјавија тутунарите, истакнувајќи дека доколку Владата продолжи да ги игнорира, тие нема да застанат, тука ќе продолжат пред Владата да кршат и да палат како што се правело низ целиот свет.

Околу 150-те тутунари рекоа дека се разочарани од лагите и од односот на Владата кон нив.

Тутунарите од Пелагонискиот регион, Прилеп, Долнени и Радовиш се назадоволни од ниските откупни цени и се револтирани од непочитување на договорот што го постигнаа на последната средба со Владата.

„Дијалогот ќе продолжи, наша одговорност е имплементирање на законите и секогаш сме тука да помогнеме во разговорите меѓу двете страни“, изјави вчера на прес-конференција заменик-министерот за земјоделство, Перица Иваноски. Тој додаде дека се засилени контролите на откупните пунктови. Покрај Инспекторатот, Министерството ги мобилизира и подрачните единици, како и Агенцијата за поттикнување на развојот на земјоделството.

„Можеме само да гарантираме дека земјоделците, по завршување на откупот и контролите, ќе ги добијат во целост предвидените субвенции, 60 денари за килограм“, нагласи Ивановски.

Според вицепремиерот Владимир Пешевски, постоеле организирани групи што го попречувале откупот. Затоа земјоделските инспектори ќе излезат на терен да го контролираат откупот. Пешевски вчера додаде дека доколку се почитуваат класите, се очекува да се постигне просечна цена од 170 денари. Ако на тоа се додаде и износот на субвенцијата од 60 денари, се доаѓа до една просечна цена од 230 денари по килограм, приход за производителот.

„Тоа е втора историски највисока цена што ќе ја одбијат тутунарите во својот џеб“, изјави тој.

Инаку, во Прилепско сите пунктови се отворени, а цената се движи меѓу 140 и 150 денари, додека во Долненско и во Новаци цената е од 100 до 120 денари. Во Струмичко цената на тутунот достигнува 115-120 денари.

И стечајните работници од Куманово вчера протестираа два часа на влезот во Куманово. Повторно го изразија незадоволството од односот на власта кон нивниот проблем. Тие симболично накитија елка, наместо со лампиони, со пораки упатени до Владата и до премиерот Груевски. Се пожалија дека новогодишните и божикните празници ќе ги поминат со посна трпеза. Доколку нивното барање не биде исполнето за две седмици, Здружението на стечајни работници најавува масовни протести што ќе се одржат на 18 јануари.

„Ќе преземеме порадикални чекори по Нова година. Стечајците немаат денар во џебот ниту за празниците ниту по празниците“, изјави Лилјана Георгиевска, претседател на Здружението.