Раселените се' уште во колективни центри

Здружението на раселените лица од Арачиново „Зора“ упати порака до властите, меѓународната јавност и до граѓаните на Република Македонија за, како што се наведува, нереализираниот дел од Рамковниот договор и состојбата со 766 внатрешно раселени лица - Македонци, Срби и Роми, од конфликтот во земјата во 2001 година. Арачиновци бараат забрзување на судските постапки пред сите судови, судскиот совет и сите надлежни институции.

„Единствена неимплементирана точка од Рамковниот договор во која индиректно се третираат раселените Македонци, протерани во кризата во 2001 година, е анекс Ц точка 3 од овој Договор“, наведуваат од Здружението. Внатрешно раселените лица од Арачиново се' уште се сместени во колективните центри „Сениќ“, „Партение Зографски“, „Ранка Милановиќ“, „Здравко Цветковски“ и „Стив Наумов“.

Во текстот се потсетува дека раселените од Арачиново веќе осум години водат маратонска судска постапка, а петнаесетте предмети на внатрешно раселените лица од Арачиново и натаму се во ќор-сокак. Законот за облигациони односи, посочуваат тие, не важи само за внатрешно раселените лица. Наспроти донесените, како што велат, мизерни пресуди што во просек изнесуваат по 20 илјади евра за семејство, куќите на Македонците во Арачиново се продадени за никакви пари, или се опожарени или, пак, се доразурнати.

„Имотите на раселените се узурпирани, а бројот на починатите ја достигна бројката од 55 лица, од кои две се убиства во Арачиново и едно самоубиство“, пишува во текстот на здружението. Според нив, се поставува прашањето дали на раселените лица не им се решава судскиот спор само за да се држат како заложници во колективните центри или намерата е по природен пат, со смрт на раселените, проблемот да се реши сам по себе. (П.Р.)