Похумани услови за пациентите во Бардовци

Болните ќе се сместуваат во простории со еден, два или најмногу со три кревети

Во Психијатриската болница во Бардовци, пациентите, место во шесткреветни и осумкреветни болнички соби, ќе се сместуваат во простории со еден, два или најмногу со три кревети, кои ќе имаат и посебни тоалети. Ваквиот комодитет се предвидува со реконструкција на постојниот објект на Психијатриската болница, кој е павилјонски тип болница и чии објекти се постари од 50 години.

„Вредноста на првата фаза е 2,1 милион евра. Ќе се реконструираат два поголеми тракта, делот за акутни пациенти и за психогеријатрија, односно за постари пациенти и два други тракта. Во втората фаза влегуваат уште два објекта од болницата. Целта е не само да се подобрат условите, туку комплетно да се модернизира болницата и целиот систем на лекување на душевните пациенти. Рокот за завршување на градежните работи е 13 месеци“, истакна министерот за здравство, Бујар Османи, во стартот на реконструкцијата, која е дел од проектот за реновирање, изградба и доградба на над 40 болници во Македонија.

Намерата на Министерството, како што посочи Османи, е да се оди кон деинституционализација на овие пациенти, преку ставање акцент на центрите за ментално здравје, каде што ќе се третираат на дневна основа.

Османи истакна и дека е започнато испитувањето на функционалната и структурна стабилност на сите јавни здравствени установи, за да се спречат евентуални случувања како она со покривот на тетовската болница. „Ги реконструираме и паралелно ги испитуваме сите кровни конструкции за да утврдиме колку се стабилни“, додаде Османи. (Ј.Ј.)