Референцата како план Б

Eдинствен притисок што го трпи Грција во Брисел е да се справи со економската криза

Слободанка Јовановска

Државниот врв си губи време и си троши од кредибилитетот, барајќи прием во НАТО и преговори со ЕУ со референцата БЈРМ, е општ став на сите што го следат спорот за името и во Македонија и надвор.

„Не може одеднаш од небо да извадите таков предлог. За да биде тој прифатлив во меѓународната заедница, треба одреден контекст и подготовка на терен. Истото тоа не успеа пред две години на самитот во Букурешт, кога климата кон Македонија беше попозитивна и го имавме американскиот лидер Џорџ Буш на наша страна, па нема шанси да помине сега. За да се успее, требаше досега да се подготви атмосфера и да се повлечат евентуално некои од провокативните „антички“ потези кои и станаа аргумент за вето на Грција“, оцени дипломат упатен во спорот за името. Грчки извори од Брисел, исто така, барањето го сметаат за апсурд, бидејќи Атина веќе го одби на самитот во Букурешт, па ќе го одбие и сега, бидејќи секогаш може да се повика на аргументот дека Македонија прва ја прекрши Привремената спогодба. „Би било политичко самоубиство ако Атина прифати датум за Македонија или прием во НАТО со референцата, бидејќи во сегашната

3економска ситуација в�� земјата премиерот Папандреу нема простор за маневар“, вели овој извор. Според него, единствен притисок што го трпи Грција во Брисел е да се справи со економската криза и никој не го прави тоа за спорот околу името на Македонија.

Референцата нема шанси, е став и на Зоран Талер, известувач од Европскиот парламент за Македонија, бидејќи, според негова оцена, Грција не би го дозволила тоа, иако би го поддржале сите други. Според него, Македонија моментно има три проблеми, цврстиот став на Атина за спорот, немањето интерес во ЕУ и во САД да се ангажираат да се реши спорот и немањето цврста стратегија во Владата во Скопје и меѓу позицијата и опозицијата во Македонија што да се прави околу проблемот. Во прилог на блокадата одат и очекуваните бројни критички забелешки во ноемврискиот извештај како резултат на летаргијата околу реформите, па и одењето назад во некои од областите, поради што Македонија се' помалку е на дневен ред во Брисел. „Во Македонија мора да престане ова дриблање кој е крив. Со тоа земјата се доведе во пат-позиција“, оцени Талер, додавајќи дека Владата треба да бара решение, а не постојано да ја менува темата, како ова сега со референцата.

Процените во ЕУ се дека игрите околу македонско-грчкиот спор почнале да личат на детска градинка, со Грците кои глумат дека се навредени од однесувањето на Македонија и со нашите функционери кои не кажуваат што сакаат. Неофицијално, и еврокомесарот Штефан Филе почнал да се држи настрана од спорот, бидејќи не сака да си го троши кредибилитетот во спор кој нема изгледи дека ќе биде решен.

Зошто, по сите овие пораки, претседателот Ѓорѓи Иванов, шефот на дипломатијата, Антонио Милошоски, и министерот Зоран Коњановски во Рим, Стразбур и во Вашингтон туркаат нереално барање во НАТО и во Европската унија?

По се' изгледа, станува збор за алиби политика, бидејќи со блокираните преговори и распрсканите илузии дека е можно решение, друго моментално не остана, а самитот на НАТО и извештајот на ЕУ се веќе на дофат. Од Брисел уверуваат дека препораката за преговори од минатата година нема шанси да биде проблематизирана годинава, но за неа се' помалку се расправа, а на Грција не и' се брза. (С.Ј.)