Ако снема вакцини, ќе се позајмат

Вакцината против хепатитис Б е релативно нова и долга е постапката да се најде на листата на СЗО

Јасмина Јовановска

Ако на тендерот што ги проби сите рокови за завршување не се избере производител од кој ќе се набават вакцини против хепатитис Б, државата уште денес ќе зајми и ургентно ќе увезе 10.000 дози вакви вакцини. Со вакво резервно решение излезе Бирото за лекови за државата да не се доведе во ситуација да нема вакви вакцини, чии резерви се при крај. „Заемот ќе биде од производителот ’Авентис‘“, рече директорот на Бирото за лекови, Илчо Захариев, не откривајќи притоа од која држава, туку рече само од земја-производител во Европската унија. „Со другите вакцини немаме проблем“, додаде Захариев.

Од Министерството за здравство вчера не сакаа да ги откријат лоби-групите, односно кои од доставувачите лобирале околу тендерот, иако завчера признаа дека имало лобирање. Според правилата на управната постапка, пак, доколку имало притисоци или лобирања, тогаш тендерот требало да биде поништен.

Од друга страна, директорот на Бирото за лекови, Захариев, ги отфрли сомнежите што ги иницираше претставништвото на „Глако Смит Клајн“ околу квалитетот на вакцините кои ќе се увезат со претстојниот тендер, посебно што вакцин��та против хепатитис Б ја нема на листата на препорачани вакцини на Светската здравствена организација.

„Апсурдно е да се тврди дека вакцината против хепатитис Б е неквалитетна ако се знае дека станува збор за врвен производител кој е од САД каде што таа е регистрирана и се користи таму и во Европа“, рече Захариев, кој додаде дека оваа вакцина е релативно нова и постапката да се најде на препорачаната листа на вакцини на СЗО е долга.

Захариев уште тврди дека секоја серија вакцини во Македонија се испитува за сите параметри, освен квантитативен состав. „Дали има доволно антигени својства се испитува во референтните лаборатории во Велика Британија, Хрватска и Србија“, рече Захариев.

Во врска со ниските цени на вакцините што се нудат на тендерот и сомневањето за квалитетот, Захариев нагласи дека цената и квалитетот не смеат да бидат споредувани и е несериозно ако некој го прави тоа.

„Конкуренцијата на македонскиот пазар во делот на вакцините беше добра работа за да се понудат и такви со поевтини цени. Тоа се врвни производители од земји од ЕУ“, додаде Захариев.

За елиминираната фирма од тендерот, во Бирото за лекови велат дека при проверка на условите за чување кикснал генераторот, кој се вклучил со задоцнување.