Штип- Ангел Динев (75) од село Чешиново загина во петокот, околу 11 часот, на патот Штип - Делчево, во близина на своето село, откако во него удри џип „гранд чироки“, управуван од Д.Б. (38), сопственост на ловното друштво „Црн вук“ од Лозово.
Според полициски извори, Ангел Динев се движел со мотор марка КТМ кога во него удрил џипот и го исфрлил во крајпатните оризови ниви. Од ударот моторот се запалил и Динев изгорел во пожарот. Увидот траеше 3,5 часа, а притоа сообраќајот на оваа фреквентна магистрала беше затворен. Се создаде колона од дваесетина километри. Возачите нервозно реагираа на бавноста на постапката на надлежните.
Се чекаше прилично долго и на возилото за итна медицинска помош од кочанската болница, а потоа и на погребното возило на јавното претпријатие. (И.Б.)
