Колку ќе поскапи струјата станува енигма
ЕЛЕМ извести дека бара зголемување од 39 проценти, а според известувањето до РКЕ, барањето е дури за 77 отсто
Маја Томиќ
Колку, всушност, ќе поскапи струјата во Македонија? Дали за 39 отсто или за 16 отсто, или можеби за над 70 проценти? ЕЛЕМ минатата недела достави до Регулаторна комисија за енергетика барање за зголемување на цената на произведен киловат-час енергија, од досегашните 1,3 на 1,8 денари за еден квч.,што значи дека бара поскапување за околу 39 проценти. По неколку денови, премиерот Никола Груевски изјави дека струјата нема да поскапи за толку, туку за 16 проценти, бидејќи државата и понатаму ќе субвенционира дел од трошоците на компанијата. Прикажаниот процент од 16 отсто, според експерти, е добиен под претпоставка дека и дистрибутерот ЕВН-ЕСМ не би побарал од Регулаторна повисока цена на електричната енергија, што е малку веројатно.
Но, збунува бројката прикажана на веб-страницата на Регулаторна комисија, каде што во известувањето за доставеното барање на ЕЛЕМ за повисока цена на струјата, стои дека максималната регулирана цена на ЕЛЕМ за периодот 1 октомври до 31 декември годинава е 2,3 денари. Дали тоа значи дека компанијата бара, не поскапувањето од 1,8 денари за киловат-час, туку од 2,3 денари? Ако е така, тоа би значело се бара поскапа струја за дури околу 77 проценти. Или, повторно во случај ЕВН-ЕСМ да не побара зголемување на цената, тоа би значело дека крајните потрошувачи ќе добијат за околу 44 отсто повисоки сметки за струја.
Во ЕЛЕМ објаснуваат дека цената од 1,8 денари за киловат-час е онаа цена која компанијата, всушност, ја бара за себе. А, максималната цена од 2,3 денари прикажана во барањето до РКЕ, всушност, е разликата меѓу увозната и домашната цена на ЕЛЕМ, и таа изнесува 0,5 денари за киловат-час. Таа, како што објаснуваат во ЕЛЕМ, е променлива категорија и може да изнесува повеќе или помалку од 5 денари.
Според експертите, ЕЛЕМ навистина бара поскапа струја за 77 отсто, односно крајно поскапување на струјата од околу 45 проценти, при што ЕЛЕМ за себе ќе ги задржи парите од зголемување од 1,8 денари за киловат-час, а разликата до 2,3 денари, од онаа барана максимална цена, ќе биде употребена за увоз на струја.
Тоа јасно кажува дека ЕЛЕМ ќе мора да увезува струја, бидејќи остварува помало производство од просечното, кое инаку изнесува околу 6.000 гигават-часови, што компанија не го признава и тврди дека капацитетите остваруваат 100 и повеќе проценти од планираното производство. Така, ако РКЕ му ја дозволи на ЕЛЕМ таа максимална цена од 2,3 денари за киловат-час, тоа ќе значи дека реално бара покачување на цената за 77 проценти, а не за 39. Ова зголемување на ЕЛЕМ би му донесело годишен приход од околу 70 милиони евра, што е за три пати повеќе од она што сега го остварува, коментираат експерти. |
