ММФ сега официјално не' скенира
Тим на Меѓународниот монетарен фонд од вчера престојува во официјална посета на земјава, со цел да ја скенира економската состојба и да го заокружи двегодишниот аранжман со Македонија кој завршува месецов. Се' поизвесно станува дека нема да се склучува нов аранжман со фондот и дека во иднина улогата на ММФ ќе се ограничи на советодавна, иако експертите укажуваат дека на Македонија и натаму и' е неопходен аранжманот со ММФ. Засега членовите на тимот на ММФ се без својот шеф Марк Грифитс, кој треба да им се придружи за неколку денови. Грифитс во јули годинава беше во неформална посета на земјава, со цел да предупреди на слабите точки на кои треба да се фокусира македонската економија. Јулската неформална посета сега продолжува во официјална форма и претставува редовна практика на ММФ што се прави на две години во земјите со кои мисијата има склучени аранжмани.
Во фокусот на официјалната септемвриска посета на ММФ ќе бидат инфлацијата, БДП, трговскиот дефицит. Грифитс во јули веќе посочи дека горливи прашања за македонската економија се овие три параметри, а посебно трговскиот дефицит кој за седум месеци набилда 1,76 милијарди долари. (А.С.) |
