Лозарите на протест, ги бараат ланските цени

За денес е договорена нова средба во Владата на која ќе присуствува и вицепремиерот Владимир Пешевски

Ангел Данов

Неколку стотици лозари во саботата излегоа на протест пред винарската визба „Тиквеш“ во Кавадарци. Го изразија револтот од, како што велат, понижувачките цени што годинава ги понудија преработувачите за винското грозје.

Протестот за момент излезе од контрола, кога во управната зграда на „Тиквеш“ почнаа да влегуваат деловни партнери на оваа винарска визба од Хрватска. Настана мешаница. Гневот го насочија кон нив. Интервенираше полицијата и спречи посериозен инцидент. Откако лозарите сфатија дека кон погрешни луѓе го искажаа револтот им се извинија на гостите. Додека со полициска придружба ја напуштаа управната зграда гостите беа поздравени со аплауз. Кај три возила гневните лозари предизвикаа мали штети.

Градоначалникот Александар Панов најави дека за денес е договорена нова средба во Владата, на која ќе присуствувал и вицепремиерот Владимир Пешевски. Се' до конечното решавање на проблемите и враќање барем на ланските откупни цени лозарите остануваат на протест. Тие бараа министерот за земјоделство, пратеникот од Кавадарци, д-р Јован Гинев, и премиерот Никола Груевски да дојдат и одблизу да се запознаат со нивната мака, а не да крстосуваат само за време на избори.

Извршниот директор на „Тиквеш“, Ѓорѓи Петрушев, им кажа на лозарите дека решението на проблемот не зависел само од двете страни, туку оти било потребно да се вклучи и државата, а и дека со блокади не може да се дојде до решение. „Секогаш кога ’Тиквеш‘ прв објавувал цени бил обвинуван дека и ја диктира нивната висина. Затоа сега се воздржавме за другите и пазарот да ги формираат цените. Ние сме изложени на конкуренција, како и сите други, и не можеме да одиме спротивно на побарувачката. Слушате какви се цените за наливното вино. Ние годинава немаме политика да продаваме наливно вино. Продаваме висококвалитетно. Неколку пати објаснив за цената од седум денари, но спомнете дека има и 14 денари“, им рече на лозарите во дворот на винарската визба извршниот директор на ВВ „Тиквеш“, Ѓорѓи Петрушев.

За време на протестите капиите на „Тиквеш“ не беа блокирани од лозарите, иако од визбата се пожалија дека со протестот се попречуваат лозарите што имале покани да го предадат грозјето. Додека едни протестираа, имаше и голем број лозари што беа на лозјата и береа. Нивниот коментар е дека сега, во екот на бербата, не е најсоодветен момент за штрајкови, бидејќи ќе скапе родот. Повеќе од пет дена неколку десетици лозари со своите натоварени трактори чекаат да го продадат грозјето во селото Камен Дол. Се жалат дека големи количества од родот им пропаѓаат, бидејќи ширата од грозјето истекла од приколките, а грозјето почнало и да ферментира.

За пратеникот од Кавадарци од редовите на ВМРО-ДПМНЕ, д-р Јован Гинев, биле неразбирливи нападите што на прес-конференција ги изнесе ОО на НСДП од Кавадарци. Тие го обвинија Гинев за незаинтересираност да им помогне на лозарите, бидејќи во парламентот не кажал ниту збор за маката на лозарите. „Владата нема да се откаже од натамошното посредување меѓу лозарите и винарите. Опозиционите партии да не градат политички маркетинг врз маката на лозарите“, порача пратеникот Гинев на прес-конференција.

Во посредувањето меѓу лозарите и винарите е вклучен и градоначалникот на општина Кавадарци, Александар Панов. „На состанокот во Владата сите визби, освен ’Тиквеш‘ и ’Повардарие‘, најавија дека ќе ги вратат ланските цени. Најавено е и зголемување на количествата што ќе бидат откупени. Има надеж оваа година да ја спасиме бербата, а за наредната година ќе се донесе закон за вино, со што многу работи ќе се регулираат“, истакнува Панов.