Анте не' научи дека без поезија го нема невидливото
„Струшките вечери на поезијата“ по повод 80-годишнината од раѓањето на истакнатиот македонски поет, академик Анте Поповски, одржаа омаж на кој говореше проф. Венко Андоновски. Поповски е еден од основоположниците на оваа манифестација и на овој начин му беше оддадена благодарност. Нарекувајќи го великан на македонската поезија, проф. Андоновски во својата беседа, меѓу другото, рече: „Тој не' научи дека нема поезија ако го нема невидливото. Тој е апсолутен поет и камен-темелник на македонската современа поезија. Постоењето на таа космичка леќа со која се гледа невидливото во поезијата на Анте, подвлече Андоновски, отсекогаш ме воодушевувала. Тој се залагаше поетот и уметникот секогаш да трагаат по невидливото, како што и тој самиот од 1959 до 2004 година креираше космос на мистерии и потрага по татковината, а во ’Света песна‘ го загатна прашањето за смртноста и бесмртноста, односно: Кои сме? Од каде доаѓаме? Каде одиме?. Неговите последни стихови се антологиски, заврши Андоновски, со нив остави длабоки духовни пораки и големо влијание во македонската поезија и за тоа сум му бескрајно благодарен“. |
