„Метастаза“ ќе ја шири истрагата

Триесет и тројца лекари и посредници завршија во притвор, а по четворица се трага поради малверзации со инвалидски пензии

Ортопеди, психолози, неврохирурзи, психијатри, кардиолози, пулмолози, терапевти, но и административци и архивари, кои според полицијата, биле дел од синџирот на „метастазата“, вчера попладне завршија во притвор поради сомневање дека учествувале во малверзации со инвалидски пензии. По целовечерното испитување пред истражен судија во Основниот суд Скопје 1, на 33 од уапсените им е одредена мерка притвор и тие со шест полициски комбиња беа префрлени во затворот „Скопје“. Полицијата се' уште трага по четворица, за кои има сознанија дека не се во земјава. Најголем дел од приведените се звучни лекарски имиња од скопските јавни и приватни клиники, но има и медицински лица од Тетово, Крива Паланка, Куманово, Велес и од Струга.

Заминувањето на полициските возила од судот кон затворот „Скопје“ беше будно следено од најблиските роднини на притворените. Некои од нив плачеа, други довикуваа, а трети заминувањето на возилата го проследија со скандирања и извици. Според неофицијални информации, најголемиот дел од приведените лекари, членови на првостепената и на Ревизионата комисија, како и вработени во ПИОМ во текот на 12-часовната истрага одлучиле да се бранат со молчење, но имало и мал број од нив што дале своја одбрана. Како што дознаваме, на еден од приведените му се влошила здравствената состојба, поради што во судот била повикана Итна медицинска помош.

Полицијата ја осомничи 37-члената група за злосторничко здружување, со цел „злоупотреба на службената положба и овластување“, „примање поткуп“ и „фалсификување исправа“. Решението за притвор на групата е испишано на 126 страници, а ова е прв случај каде што осомничените не беа задржувани во полициски станици, туку беа директно изведени пред истражен судија.

Акцијата „Метастаза“, која кулминираше завчера со масовни апсења во здравствените установи, започнала пред една година кога полицијата добила сознанија за малверзациите со инвалидските пензии.

Со примена на посебните истражни мерки, во изминатите 365 дена од МВР тврдат дека прибрале доказен материјал од 300 страници, кој е предаден до истражните органи во судот. Завчера биле извршени претреси кај 15 лица, а кај тројца од нив била пронајдена поголема сума пари (само кај еден од лекарите се пронајдени 50 илјади евра). Во досегашната истрага се евидентирани 57 случаи, односно баратели на инвалидска пензија, но од МВР велат дека постојат уште 200 сомнителни случаи, кои допрва ќе се истражуваат.

Според полицијата, во малверзациите учествувале претседатели и членови на Ревизионата и на Првостепената комисија за утврдување инвалидност, лекари од повеќе јавни и приватни здравствени установи, медицински лица и посредници, кои ги пронаоѓале барателите на инвалидски пензии, а во синџирот имало и лица што фалсификувале медицински документи.

„За работата што за завршувале, тие добиле парична награда од 1.500 до 4.000 евра што ја исплаќале барателите на инвалидски пензии. Досега се идентификувани 57 баратели на инвалидски пензии, од кои 26-мина веќе добиле инвалидска пензија, 10-мина добиле решение, но тоа не е процесуирано, а за 21 барател постапката се уште е во тек“, информираше вчера помошник-министерот за информирање во МВР, Иво Котевски.

Групата, според сознанијата на МВР, досега заработила околу 165.000 евра, или над 10 милиони денари со овој бизнис, а на Фондот за ПИОМ му била нанесена штета од околу 53.000 евра, со исплата на нелегалните инвалидски пензии.

Полицијата нема поднесено кривични пријави против барателите на инвалидски пензии, и покрај тоа што дел од нив морале да плаќаат мито за да им се забрза работата. „Што ќе се случува со нив, ќе се утврди во судската постапка“, вели Котевски, објаснувајќи дека станува збор за две групи граѓани, оние што немале право да добијат пензии, па на секој начин се обидувале да го сторат тоа, и втората група, кои ги исполнувале условите за пензија, но постапката им била одолжувана само за да бидат изнудени пари од нив.

Како првообвинет и организатор на групата, полицијата товари кардиолог од скопската Клиника, кој бил и претседател на Комисијата за ревизија за утврдување на инвалидност, како и претседателка на првостепената комисија, кои, наводно, имале увид и контрола над сите барања за инвалидска пензија. Двајцата се товарат дека ја координирале групата, во која најпрво посредници наоѓале баратели на инвалидски пензии, а потоа тие биле носени на прегледи кај лекари, кои им давале лажна медицинска документација, со дијагнози со кои најлесно се добивала инвалидска пензија. Меѓу притворените има 17 лекари-специјалисти од приватните и од јавните клиники, кои издавале лажни документи и медицински наоди, пишувале дијагнози, без воопшто и да ги прегледуваат пациентите. Двајца лекари добија пријави и за земање поткуп, бидејќи побарале 2.500 евра од еден граѓанин, а успеале да земат 1.500 евра, ветувајќи му инвалидска пензија. (Д.Т.-Љ.С.)