Во „Бучим“ пријавени 540 кандидати за 47 работни места

Штип – Рудникот за бакар „Бучим“ распиша оглас за прием на 47 работници од разни профили за потребите на новиот погон за лужење, процес од кој ќе се добива катоден бакар. На огласот се јавија 540 невработени радовишани, што значи дека за едно работно атакуваат 12 кандидати.

„Баравме металуршки, машински, хемиски и електротехничари. Интересот да се обезбеди работно место ги надмина сите наши очекувања. Меѓу кандидатите за работни места за кои е предвидено средно стручно образование имаме лица со завршен факултет, а кои во рудникот би работеле како среднисти. Така, за четири работни места хемиски техничар конкурираат шестмина дипломирани хемиски инженери и ние на работа ќе примиме од оваа категорија кандидати“, вели Николајчо Николов, заменик- генерален директор во „Бучим“.

На огласот, пак, за една хигиеничарка се пријавија дури 42 невработени жени од Радовиш. Неколку од нив имаат факултетско образование, а шеснаесет кандидатки се со завршена гимназија.

Има две причини за големиот интерес да се обезбеди работно место во рудникот. Првата е фактот дека во Радовиш се затворени четири од петте големи стопански капацитети, „Јака табак“, „Декортекс“, ЗИК „Радовишко Поле“ и „Јака 80“, додека во полна работна кондиција остана само „Бучим“. Во исто време во градот со месеци нема огласи за нови вработувања. Втората причина се, за наши услови, високите плати што се заработуваат во рудникот, поради што и лица со високо образование се подготвени да работат на работни места за кои, во согласност со систематизацијата и потребите на „Бучим“ се предвидени среднисти. Просечната нето-плата во рудникот во текот на оваа година изнесува 430 евра. (И.Б.)