Во септември пари од банките на поранешна СФРЈ

Властите на Босна и Херцеговина ќе бараат на септемврискиот состанок на претставниците на државите-наследнички на СФРЈ , во Сараево, на дневен ред да биде ставено и решавањето на прашањето за состојбата на девизните сметки кај југословенските банки за заеднички инвестиции во странство, во вредност од 645,55 милиони американски долари, пишува сараевско „Ослобоѓење“.

Помошник-министерот за финансии задолжен за прашањето за сукцесија, Зенит Келиќ, истакна дека од 2001 година пос��ојат 16 обиди за решавање на ова прашање.

„Србија стои на ставот дека средствата се потрошени во меѓувреме, односно дека ги нема и поради тоа не можат да бидат предмет на расправа. Тоа е неприфатливо, бидејќи во рамките на Договорот за сукцесија на поранешна СФРЈ договорено е тој да го третира и ова прашање“, изјави Келиќ. Според него, во случај да нема средства, тогаш мора да се каже кој ги потрошил и на каков начин ќе се утврди одговорност на оној што треба да ги надомести.

Келиќ тврди дека поради ова прашање, односно инсистирањето на Хрватска, која побара да се утврди докрај што се случило со „спорните“ средства и да се одреди нивниот конечен износ и распределба, доцнела и ратификацијата на Договорот за сукцесија договорен пред три години. (МИА)