Претходен број

Иванов: Нема да прифатиме навредливо решение

Белград/Скопје - Македонија во спорот со Грција околу името настојува да биде постигнат компромис, но нема да прифати решение што ќе го навредува достоинството на македонските граѓани, истакнува претседателот Ѓорге Иванов во вчерашното интервју за српскиот весник „Блиц“.

„Македонија и нејзините граѓани остануваат доследни на стратегијата за дијалог и компромис. Меѓутоа, медијаторот и нашите партнери и сојузници во ЕУ и во НАТО, како и многу грчки лидери, знаат дека непринципиелниот компромис нема да и' донесе добро на ниедна од земјите, затоа што повредена и навредена држава не може да биде вистински сојузник и пријател. Поради тоа, сите решенија и компромиси што ги бараме мора да водат сметка за тоа да не се навредуваат и запоставуваат идентитетот и достоинството на нашите граѓани“, вели претседателот Иванов.

Конечниот збор за евентуалниот, како што посочува, рационален компромис за името, ќе го имаат граѓаните на Македонија.

Во интервјуто шефот на македонската држава се осврнува и на односите на Македонија со Србија и со Косово. Иванов нагласува дека признавањето на независноста на Косово е донесено врз база на националните интереси на Македонија и не треба да се дозволи тоа да биде пречка за подобрување на односите со Србија.

„Прашањето треба да се гледа од регионална и од меѓународна перспектива, земајќи ги предвид и спецификите на македонското општество. Косово не треба да ги оптоварува билатералните односи. Повеќе од јасно е дека Македонија и Србија имаат полно право да формулираат своја политика врз база на сопствените национални интереси“. (МИА)