Претходен број

Косовските Срби формираа свој парламент

Тоа треба да биде „репрезентативно тело на српската република во автономната покраина Косово“

КОСОВСКА МИТРОВИЦА - Србите на Косово во саботата формираа сопствено собрание во поделениот град Митровица, што претставува нов предизвик за етничкото албанско мнозинство на новата држава и нејзините поддржувачи од Запад. Собранието нема извршена власт, туку е одраз на се' подлабоката етничка поделба на Косово откако прогласи независност од Србија во февруари. „Српскиот парламент ќе се бори против создавање на уште една албанска држава на Балканот“, изјави националистичкиот лидер на косовските Срби, Марко Јакшиќ. Во соопштението прочитано на седницата, беше истакнато дека собранието ќе биде „репрезентативно тело на српската република во автономната покраина Косово“.

Албанското раководство на Косово го осуди тој чекор како илегална провокација. Но, посматрачите на ОН забележаа дека собранието нема „оперативна улога“ и дека е само симболично тело. Деведесет проценти од два милиона население на Косово се Албанци. Тие прогласија независност пред четири месеци, девет години откако беа протерани српските сили со воздушна кампања на НАТО. Косово е признато од 43 држави, меѓу кои САД и поголемиот дел од Европската унија.

Северниот дел на Косово, што се потпира на Србија, е надвор од институцискиот дострел на Приштина, и моментно надвор од границите на полициската мисија на ЕУ, која треба да ги преземе правните и полициските должности од ОН. Аналитичарите истакнуваат дека на собранието му недостига целосна поддршка од Демократската партија на Србија која е проевропски ориентирана, а која треба да ја води новата коалициска влада во Србија бидејќи ги порази националистите. Наместо тоа, се чини дека националистичките тврдокорни струи се обидуваат да ја задржат власта во Митровица, седиштето на паралелниот систем на Србите на Косово. Делегатите на Демократската партија не беа присутни на седницата.

Косовските Срби кои ја отфрлаат независноста на Косово, ги бојкотираат и полициските сили на Косово, судовите и администрацијата, и ги запалија царинските испостави на северната граница со Србија. Генералниот секретар на ОН, Бан Ки Мун, му посочи на шефот на мисијата на ОН на Косово да започне дијалог со новата влада во Белград за да се реши се' подлабоката поделба, што е одраз на политичките потези на Србија во српските области.

Парламентот беше формиран на Видовден, годишнината од Косовската битка од 1389 година, кога Србите беа поразени од Турците на полињата северно до Приштина. Епскиот пораз остана врежан во српската историја и има централно значење за српските претензии кон Косово како нивен Ерусалим. Единиците на НАТО ја зајакнаа безбедноста додека стотици Срби беа придружувани од полицијата на косовските Албанци на споменикот на Газиместан, на местото каде што се одвивала битката во 14 век. (Ројтерс)