Во „Матица“ читателите избираат хит на летото

Клубот „Матица“ и годинава во рамките на акцијата „Со книга на плажа“ на читателите им овозможува сами да го изберат хитот на летото. На членовите на овој клуб им се нудат шеесеттина нови наслови излезени во периодот мај-јуни, а како што не информираа од „Матица“, изборот е поделен на два дела. Во првиот дел, по десетдневно гласање, читателите одлучија во најтесен круг да влезат книгите: „Ќерката на чуварот на спомените“ од Ким Едвардс, „Кралска крв“ од Харолд Робинс, најновото остварување на Тони Парсонс „Мојата омилена сопруга“, неверојатно волшебната приказна „Белата масаи“ и книгата што е во најтесниот круг за избор на Букеровата награда за 2009 година, „Дрво на ангелите“ од Пени Самнер.

Конечните резултати ќе бидат познати на 11 јуни кога читателите ќе го изберат хитот на летото. Како што велат во „Матица“, „сево ова е само увертира и почеток на веќе традиционалната кампања „Со книга на плажа“, која по осми пат ќе се одржи во периодот од 20 јуни до 20 август.“ (Н.П.)