Сашо Димиќ руинирал општински објект

„Поранешниот градоначалник Сашо Димиќ речиси го уништил објектот што му е даден на користење без надомест од Општината“, обвини вчера градоначалникот на Карпош, Стевчо Јакимовски. Се работи за објект во кој била сместена игротеката „Хани“, од која по раскинувањето на договорот со Димиќ, недостасуваат речиси сите делови од ентериерот.

„Крајно сме револтирани од вандалското однесување на поранешниот в.д. градоначалникот на Карпош, Саша Димиќ, со имотот кој му е даден на користење од страна на Општината“, истакна Јакимовски, кој посочи дека од општинскиот објект недостасуваат цел ламинат, севкупната санитарна галантерија, фрижидер и кафемат, како и сите детски реквизити, внатре и во дворот.

„Деловниот простор уште при крајот на 2007 година му е доделен на тогашниот советник во Општината, Димиќ, на користење без надоместок за закупнина. Тој за возврат требало да го опреми просторот и да го адаптира. Тоа било сторено од страна на некоја фирма, но откако неодамна му бил раскинат договорот на Димиќ, деловниот објект е видно руиниран и речиси уништен“, објасни Јакимовски, кој најави запознавање со случајот на Антикорупциската комисија, бидејќи смета дека имало конфликт на интереси кога Димиќ го зел објектот на користење. (С.Н.)