„Маврово“ во стечај, крај на една долга приказна
Вработени се префрлени во „Маврово инженеринг“, која сега брои 870 работници
Билјана Ангеловска
Управниот одбор на Акционерското друштво за градежништво „Маврово“ одлучи да поведе стечајна постапка со цел да се избегнат натамошните штети на компанијата. Причина за таквата одлука е неможноста да се исполнат наталожените финансиски обврски, кои добија на тежина со настапување на глобалната економска криза, особено поради фактот дека „Маврово“ веќе неколку години се наоѓа во финансиска блокада.
„Откако во јуни 2008 година АДГ ’Маврово‘ доби нов сопственик, направен е обид за финансиско заздравување. Но, и покрај блиската соработка со македонските државни органи и почитување на важечките прописи, не беше возможно да се изнајде решение кое би овозможило заздравување на компанијата. Затоа Управниот одбор заклучи дека стечајот е единствен начин да се избегнат натамошни штети на компанијата во целост, за нејзините вработени, доверители и за партнерите“, се вели во соопштението испратено од сопственикот на АДГ„Маврово“, загрепска „Ингра“.
Поголемиот број од вработените на АДГ„Маврово“ веќе се префрлени во компанијата „Маврово инженеринг“, основана пред неколку години. Од „Ингра“ информираат дека оваа компанија сега претставува здраво деловно јадро кое брои 870 вработени, од кои поголемиот дел до неодамна беа во АДГ„Маврово“.
„На овој начин ’Маврово‘ како компетентна градежна компанија продолжува да постои и да работи на проекти во Македонија и во странство. ’Ингра‘ и натаму останува во Македонија и во соработка со ’Маврово инженеринг‘ ќе нуди проекти во согласност со новите развојни планови, за што очекува поддршка од македонските државни органи“, е официјалниот став на хрватската градежна компанија.
Можноста за стечај на „Маврово“ беше навестена деновиве откако „Ингра“ не успеа да го добие тендерот за изведувач на 145 спортски сали, на кој работата му беше доделена на скопски „Гранит“. Хрватската компанија тврдеше дека имало незаконитости при изборот, а одново реагираше и откако беше потпишан договорот меѓу „Гранит“ и Министерството за образование. Притоа, беше нагласено дека со тоа што работата и' е доделена на друга компанија, всушност, се доведува во прашање работењето на „Маврово инженеринг’, бидејќи, како дел од „Ингра“, требаше да биде ангажирана како нејзин подизведувач на тендерот вреден 58,5 милиони евра.
Инаку, „Ингра“ како хрватска компанија со големо меѓународно искуство стана сопственик на АДГ„Маврово“ во јуни 2008 година, кога преку Македонската берза откупи 79.01 отсто од акциите во вредност од над 7 милиони евра. Набрзо по таа зделка, Хрватите го купија и „Маврово инженеринг“. Новиот газда фактички купи фирма со долгови поголеми од 20 милиони евра и со побарувања од над 10 милиони евра. Всушност, некогашниот гигант „Маврово“ почна да тоне пред повеќе од десетина години, кога фирмата која броеше неколку илјади вработени не успеа да се трансформира и приватизира. Пропаѓањето доби на интензитет во последните пет-шест години откако раководството не успеа да ги врати големите хипотекарни кредити и фирмата беше блокирана. Во 2003 година беше формирана „Маврово инженеринг“ како ДОО во сопственост на АДГ„Маврово“ и фирмата „Медијан трејд“. Кон крајот на 2007 година, АДГ„Маврово“, кое тогаш броеше малку повеќе од 1.000 вработени, го продаде, поточно, го изгуби својот удел во „Маврово инженеринг“ по основа неплатени обврски.
Во минатата година „Маврово“ имаше приближно 50-ина милиони евра достасани обврски (плати за вработените, кон доставувачи, за придонеси, за ДДВ околу 12 милиони евра, други даноци, обврски спрема банки во висина од 13,5 милиони евра), како и 7,5 милиони евра оперативна загуба од работењето.
Токму во тој период на пазарот се појави „Ингра“, во чиј интерес „Маврово“ го виде спасот од колапсот. Хрватската компанија има сериозни намери да ја врати македонската фирма на градежниот пазар, за што сведочи и понудата на проекти за кои очекува поддршка од македонските државни органи. |
