Владата вети решавање на статусот на воспитувачките

За две недели ќе се знае колку од ангажираните со договори на дело ќе останат на работа

Снежана Калабакова

Владата им вети принципиелно решавање на статусот на ангажираните со договори на дело во градинките, особено на оние со подолг работен стаж. За две седмици ќе се знае колку од ангажираните со договори на дело ќе можат да останат на работа и во кои општини има превработеност во градинките. Договорено е во иднина кога ќе се бара конечното решение на состаноците во министерствата за финансии и за труд и социјала да бидат присутни и претставници на Штрајкувачкиот одбор.

Ова накратко е одговорот на Владата на вчерашниот штрајк на негувателките, воспитувачките и техничкиот персонал од градинките од Карпош, Чаир, Струмица и од Охрид. Оттаму сметаат дека во некои општини проблемот е од релативно скоро време, поради што во неговото решавање ќе треба да се вклучат и самите општини. Владата наскоро ќе ги унифицира стандардите во вработувањето на воспитувачки и негувателки во однос на бројот на деца во градинките.

„Сигурно е дека ќе настојуваме за оние што се долго време со нерегулиран стаж да преминат во траен работен однос. Во оние општини каде што бројот на вработени значително се зголемил без одобрение на Министерството за финансии во минатата година, сепак, доколку сакаат обврски, товарот треба да падне повеќе врз општините. Од досегашните анализи се гледа дека постојат градинки каде што бројот на деца по вработен е дури и под четири, а има и такви каде што тој број се приближува кон девет. Затоа ќе се обидеме да постигнеме унифициран стандард“, рече вицепремиерот Владимир Пешевски.

ВМРО-ДПМНЕ ги окарактеризира вчерашните протести како сценарио на СДСМ со цел да се наруши угледот на Владата. На ова веднаш реагираше СДСМ со апел до ВМРО-ДПМНЕ да не ги политизира реалните и очигледни маки на негувателките.