Владата и ИВЗ во клинч

Обраќањето е повик за хомогенизација на религиска основа, смета проф. Цане Мојановски

Билјана Јовановска

И досега се случувало Исламската верска заедница со поостри соопштенија да се огласи за конкретни владини мерки кои директно ја засегаат, пред се', во делот на имотите, но завчерашната прес-конференција на поглаварот Сулејман Реџепи отиде и неколку чекори подалеку. Првиот духовник на муслиманите од државава ја посочи Владата како виновник за зголемените меѓуетнички и меѓурелигиски тензии, а доколку не го смени политичкиот курс, бидејќи трпението е при крај, таа ќе биде единствениот виновник за натамошно ескалирање на состојбите.

Причина за вербална стрелба од седиштето на ИВЗ на Бит-пазар кон Илинденска б.б. беше измената на Законот за денационализација, како и донесувањето на Законот за Старата скопска чаршија, со кои, според поглаварот, сиот имот на Заедницата ќе остане во сопственост на државата, а со тоа „дефинитивно се отстранува муслиманскиот елемент од чаршијата“.

Легитимно право на ИВЗ е да го побарува денационализираниот имот, исто како што го бара тоа и МПЦ, меѓутоа начинот на кој го прави тоа, според некои аналитичари, повеќе личи на милитантен повик за хомогенизација на муслиманите отколку на искрен обид отворените прашања да се решат. Апелот на реис-ул-улемата Реџепи не оди во полза на смирувањето на тензиите, туку може да се сфати и како сериозен повик за радикализација на состојбите.

Случајно или не, но поглаварот на ИВЗ своето обраќање до припадниците на исламот го заврши со зборовите: „Апелираме сите гласноговорници на муслиманскиот народ во Собранието на Република Македонија да бидат помудри и да им речат стоп на измените на Законот за денационализација, затоа што во спротивност ќе бидат предавници на дадениот аманет“!

Што сакаше да порача реис-ул-улемата Реџепи, не појасни. Но, многу јасно кажа дека Владата продолжува да води дискриминаторска и исламофобична политика, дека сака да ја словенизира Старата чаршија, а Албанците да ги остави да бидат кираџии во сопствениот имот. Притоа, Реџепи предупреди дека Владата треба да го смени политичкиот курс, кој не е за соживот, не е за мултиетничка и мултиконфесионална, ниту, пак, за демократска држава. Тој, меѓу другото, рече дека Владата се јавува како столб за поделба на граѓаните на етничка и верска основа, ја продлабочува омразата и поделбите, а „државата ќе ја врати во насока на крстоносците кои зад себе оставија само жртви, омраза, делби и болка“.

Валентина Божиновска, претседателка на Комисијата за односи со верските з��едници, вчера не беше достапна за коментар за обвинувањата на поглаварот Реџепи. За волја на вистината, не се огласи ниту Владата, иако беа жестоки нападите.

Проф. Цане Мојановски, поранешен претседател на Комисијата, во изјавата за нашиот весник вели: „Македонското општество не познава таков вид хомогенизации според религиска основа и таквиот повик на поглаварот Реџепи објективно им носи штета на ИВЗ и на верниците, бидејќи нужно ќе поттикне хомогенизација и на другите вероисповеди“.

Тој смета дека тоа е долгорочно несреќно решение за Македонија и потсетува дека од духовници очекуваме апели за мир и разбирање и тогаш кога им се нанесува неправда. Сите прашања, според Мојановски, мора да се решаваат во институциите на системот, во мирна атмосфера и со отворени разговори, а не со пресови, кои имаат и милитантен призвук. Бидејќи, доколку проблемите се решаваат со прес-конференции, тогаш Македонија сигурно би била земја без отворени прашања. Наедно, Мојановски нагласи дека ваквите повици на реис-ул-улемата не водат кон конкретни решенија, туку во насока на непотребно создавање на уште пожешка атмосфера.

Исламската верска заедница, доколку поседува документи, без друго треба да го добие својот денационализиран имот. Тврдат дека за изминатите 12 години добиле само 10 отсто од она што го побаруваат. Меѓутоа, јавна тајна е дека диво изградени џамии со невидена брзина никнуваат на сите страни, а Владата очигледно премолчено им го толерира ваквото однесување. Пописот на џамиите, кои немаат дозвола, никој не го соопштува, бидејќи податоците сигурно се фрапантни. Но, официјално, на подрачјето на Скопско на списокот на Исламската верска заедница, значи официјално, има 133 џамии, додека Македонската православна црква на истото подрачје располага со 112 свои храма. (Б.Ј.)