Врховен суд ја потврди казната на ексдиректорот на ОХИС, Јорго Ќука

Ќука е осуден поради злоупотребите при заложувањето на дел од акциите на компанијата за да биде земен кредит; од неговото апсење

Веста на телевизија Сител објавена во ударниот термин на вестите дека Врховниот суд ја укинал казната на ексдиректорот на ОХИС Јорго Ќука предизвика големо изненадување. Но, искрата надеж на осудениот, неговото семејство и на бранителите дека целиот судски процес се враќа на почеток траеше многу кусо, затоа што од Врховниот суд вчера ја демантираа објавената информација како комплетно неточна. Извори на „Утрински весник“ од судот тврдат дека пред две недели навистина е донесена одлука, но со неа е потврдена затворската казна од три и пол години.

Претседателот на Врховниот суд, Јован Вангеловски, вчера единствено ни потврди дека не е точна информацијата на Сител, без да навлегува во содржината на одлука. Тој во свој стил ја повтори истата реплика што ја користи во слични ситуации, а тоа е дека „се' додека одлуката не се напише и потпише од судиите, се смета како да не е донесена, бидејќи секогаш постои отворена можноста некој предмет да биде пререфериран“.

Во почетокот на јуни минатата година, Апелациониот суд во Скопје за една година му ја намали затворската казна на ексдиректорот на ОХИС Јорго Ќука, осуден поради злоупотребите при заложувањето на дел од акциите на компанијата за да биде земен кредит. Поранешниот прв човек на скопската фабрика наместо 4,5 години, колку што му пресуди Основниот суд Скопје 1 на 30 октомври 2007 година, ќе треба да одлежи една година помалку.

На раководителот на правната служба на ОХИС, Благоја Гичев, кој беше осуден на две и пол години затвор, казната му е намалена за шест месеци. На другите обвинети во случајот, кои беа осудени на условни казни, Апелација им ги потврди пресудите. (Г.Д.-Љ.С.)