Груевски: Нема зголемување на годините за пензионирање

Нема зголемување на старосната граница за пензионирање од 65 на 67 години, тврди премиерот Никола Груевски, обраќајќи им се на македонските работници, по повод Празникот на трудот - 1 Мај. Тој истакна дека Владата ќе продолжи и натаму да работи во насока на подобрување на животниот стандард, условите, заштитата и правата на работниците, како и добриот дијалог со нив. „Владата ќе ја продолжи таа силна динамика и посветеност на економијата, а со тоа на некој начин да им помогне на работниците. Во делот на заштитата на работничките права секогаш сме биле отворени и ќе останеме отворени за поддршка, помош, разбирање, разговор, дијалог и за сето она што може да се излезе во пресрет од страна на Владата“, изјави Груевски.

За премиерот ваквите информации ги подгрева опозицијата, пред се', СДСМ. „Веројатно поради немање доволно идеи и на безизлезност се обидуваат да измислат нешто како да создадат конфузија и вознемиреност кај граѓаните. Најотворено пред граѓаните и директно го демантирам тоа. Владата не планира такво нешто и нема зголемување на старосната граница за одење во пензија“ рече Груевски.

Но, премиерот не објасни зошто тогаш во Фондот за пензиско и инвалидско осигурување се прави анализа и процена колку вработени би си заминале во пензија со наполнување на 65 години за жени и 67 за мажи. Во Министерството за труд и социјална политика се правдаат дека тоа се редовни анализи за да се согледа во кој правец се движат реформите во пензискиот систем. (Ј.Ј.)