Швајцарија ги олабави банкарските тајни
Лондон - Швајцарската влада објави олеснување на правилата за банкарска тајна, со што швајцарските финансиски институции ќе можат да соработуваат со меѓународната истрага за даночна евазија. ЕК соопшти дека измените ќе водат кон подобро раководење. Швајцарија ова го прави под притисок на земји како што се САД, Германија и Франција, кои сакаат информации за наводните даночни измамници.
Швајцарскиот министер за финансии смета дека земјата се' уште ќе биде привлечна за штедачите, но претставник на опозицијата ја критикуваше Владата дека потклекнала пред меѓународниот притисок.
Париз, Берлин и Вашингтон ги предводат обидите за меѓународно справување со даночните прибежишта, а темата ќе биде високо на дневниот ред на економскиот самит на Г-20 во Лондон.
Токму пред неговото одржување, поголем број даночни прибежишта, меѓу кои и Швајцарија, ненадејно објавија реформи на долго почитуваните закони за банкарска тајна. Сите тие сакаат да излезат од проширената црна листа на даночни прибежишта, која веројатно ќе биде објавена на самитот. Идејата е земјите од црната листа да бидат предмет на санкции, што би можело да предвиди и автоматско задржување на даноците од приливот кој би доаѓал од даночните прибежишта. (МИА) |
