Криминал

Бруталните убиства ја шокираа Македонија

За криминалците веќе не постојат граници. Јавноста бара одговори како телохранител на државниот врв се нашол на иста маса со мафијаши

Љубиша Станковиќ


Како во сцена на холивудски мафијашки филм, завчеравечер жителите на скопската населба Аеродром беа сведоци на крвава пресметка во која смртно настрадаа три лица, од кои еден вработен во МВР. Со рафална стрелба од автоматско оружје, средовечен маж ладнокрвно застрела тројца гости на рибниот ресторан „Биг фиш“ во трговскиот центар „13 Ноември“ (во непосредна близина на „Три бисери“).

Убиецот, како што соопшти полицијата, вчера сам се предал, а мотивите за крвавиот чин ги лоцираат во должничко-доверителски односи. Убиецот, според МВР, е 47-годишниот скопјанецот со иницијали Т.Д., кој ги застрелал Јордан Јорданов и Влатко Андреев, двајцата од Велес, и Владо Милошев, вработен во МВР, кои седеле на иста маса.

Медиумите вчера шпекулираа дека загинатиот Милошев бил роднина на шефот на обезбедувањето на премиерот Никола Груевски. Другите две лица, пак, се поврзуваат со трговија на дрога и важат за дел од таканаречената „Франкфуртска мафија“, која оперирала во Австрија и во Германија.

Ова најново крваво злосторство во потесното градско подрачје на македонската метропола силно ги вознемири граѓаните кои стравуваат за својата безбедност, но и дополнително ја зовре атмосферата на несигурност и уште еднаш ги наметна отворените прашања за дејствувањето на македонското подземје, за што реагираше и опозицијата. Загриженоста, но и лутината за она што им се случува беше видлива и на лицата на бројните жителите на зградите околу Трговскиот центар „13 Ноември“, кои дојдоа на местото на злосторството.

Се' се случи во четвртокот вечерта, петнаесетина минути пред 20 часот, кога Т.Д., чие име полицијата и натаму не го соопштува, влегол во рибниот ресторан „Биг фиш“, а потоа со испукување рафали застрела три лица, кои во тоа време седеле во угостителскиот објект. Од истрелите, на место смртно е застрелан полицискиот работник Владо Милошев, а со тешки телесни повреди во скопскиот Ургентен центар беа пренесени велешанецот Јордан Јорданов (36), со прекар ’Ркулот, и 26-годишниот Влатко Андревски.

Десетици граѓани завчеравечер со часови стоеја пред ресторанот „Биг фиш“ и со неверување се прашуваа: дали е можно некој толку ладнокрвно да стрела во локалот, а потоа, како ништо да не се случило, да си замине, фрлајќи ја притоа автоматската пушка на тротоарот?

„Во прв момент бев збунета кога ги слушнав истрелите. Потоа ме обзеде страв, но и чувство на неверување дека е можно некој да пука во ваков фреквентен дел од населбата. Излегов да видам што се случува и дури тогаш сфатив дека некој пукал во некои непознати лица за мене. Ја видов пушката која беше фрлена на плочникот. Од соседите разбрав дека некое непознато лице влегло во рибниот ресторан, а откако стрелал во луѓето кои седеле во локалот, ја фрлил пушката и со автомобил ’опел корса’ си заминал“, раскажува нашата соговорничка, која беше видно вознемирена од она што се случило во нејзиното најблиско соседство.

Кратко време по настанот, речиси целиот преден дел на ТЦ „13 Ноември“ беше опседнат од полициски тимови. Десетици полицајци беа ангажирани во увидот што траеше до доцна во ноќта. Со часови големата екипа на форензичари беше во локалот во кој се одиграла крвавата драма, а тимови од Одделот за криминалистичка техника ги обезбедуваа пронајдените чаури, фрагменти од проектили, куршуми, мобилни телефони, автоматска пушка и друго.

Во морето од информации и дезинформации што се пласираа во четвртокот навечер, можеше да се слушне дека сите убиени се припадници на Министерството за внатрешни работи, дека станува збор за криминална пресметка на припадници на скопското подземје, дека еден од двајцата ранети е во тешка состојба, но дека другиот е надвор од животна опасност и дека на автопатот Скопје - Велес е запрено возило БМВ во кое биле две лица за кои се верува дека се извршители на ова грозоморно убиство.

Ваквите пласирани информации дополнително се подгреаја оној момент кога меѓу вработените во МВР се појави и лице кое е задолжено за обезбедување на највисоките државни фунционери. Имено, меѓу присутните се шпекулираше дека станува збор за роднина на загинатиот.

Вчера министерката за внатрешни работи, Гордана Јанкуловска, не одговори на прашањето дали загинатиот полицаец е во блиски роднински врски со телохранител на висок државен функционер. Таа, исто така, не можеше да каже зошто загинатиот бил во друштво со две лица за кои самата полиција потврдува дека минуваат низ казнената евиденција.

Долгата и мачна неизвесност, која во четвртокот се надвисна врз населбата Јане Сандански, беше прекината со изјавата на директорот на Ургентниот центар, д-р Реџеп Селмани, кој потврди дека еден од двајцата ранети починал кратко време по неговиот прием во болницата, а другиот, кај кого биле констатирани прострелни рани во пределот на градниот кош и главата, им подлегнал на повредите во операциската сала.

На самото место, околу 21,30 часот, се појавија истражен судија од скопскиот Кривичен суд и јавен обвинител, но тие во рибарницата и пржилницата „Биг фиш“ влегоа по 23 часот. По налог на истражен судија, телата на загинатите заради вршење на обдукција беа предадени во Институтот за судска медицина.

Некои од медиумите во текот на вчерашниот ден излегоа со тврдење дека осомничен за трикратното убиство е извесен Тони Денковски од Скопје и дека станува збор за сопственик на каменолом. Од МВР само соопштија дека осомничениот за трите убиства во „Биг фиш“ вчераутро околу 7 часот самиот и' се предал на скопската полиција и е со иницијали Т.Д. (47), а во разговор со полициските работници го признал извршувањето на делото и го навело мотивот.

Според Јанкуловска, можниот мотив за извршување на делото треба да се бара во должничко-доверителските односи, кои подолго време постоеле помеѓу осомничениот и Јордан Јорданов, сега покоен. Таа потврди дека Јорданов е лице коешто во евиденцијата на МВР се јавува како извршител на имотни кривични дела и дела од областа на недозволената трговија за што му биле изрекувани и условни затворски казни. Имено, како член на таканаречената „Франкфуртска мафија“, а по реализирањето на операцијата „Велес“, Јорданов извесно време беше и во притвор. Таа не можеше да потврди дали вчера полицијата вршела претреси на објекти во Велес.

„По завршување на неопходните разговори и документирање на кривичната пријава, осомничениот ќе биде предаден на истражен судија и поради сериозноста на инцидентот, ќе побараме да му биде определена мерка притвор“, рече министерката Јанкуловска, која не можеше да одговори на прашањето дали тројцата загинати имале случајна средба или се познавале отпорано и зошто вработен во шестата управа, задолжен за обезбедување на странски делегации, бил во друштво со лица од подземјето? Имено, токму за загинатиот Милошев се говори дека бил еден од главните телохранители на самата Јанкуловска.

За настанот што се случи завчера во скопски Аеродром вчера со официјален став излезе и опозициската СДСМ. И од партијата прашуваат „како е можно, среде Скопје, кога има врвулица од граѓани, како во мафијашки филм, да се случи ладнокрвно убиство во кое се убиени тројца, од кои еден вработен во МВР, телохранител на министерката Гордана Јанкуловска и баџанак на Дејан Митковски - Урко, шеф на обезбедувањето на премиерот Груевски“.

За СДСМ не е нормално полициски функционери да ручаат со дилери на дрога. Во партијата сметаат дека безредието и хаосот земаат невидени размери, вчерашното убиство е потврда дека во Македонија веќе никој не е безбеден и покрај тоа што Гордана Јанкуловска вчера изјави дека безбедносната состојба е непроменета, односно стабилна. (Љ.С.)