Владиката Петар обвини дека малцинствата во Грција се под тортура
Властите ги преземаат сите мерки да го спречат слободното дејствување на луѓето
Битола - „Малцинствата во Грција се најзагрозени од сите други на балканските и европските простори. Грчките власти со тортура ги спречуваат Македонците, Власите, Ромите, Турците, Албанците да имаат слобода на изразување на јазикот, на верата и особено на националната припадност“, предупреди митрополитот преспанско-пелагониски, г. Петар. Според него, Самитот во Букурешт докажал дека Грција, која себеси се нарекува колепка на демократијата, е најнедемократската држава во Европа. „Дури се оди дотаму луѓето да се плашат меѓусебно да зборуваат македонски и кога нема Грк покрај нив, плашејќи се дека некој ќе ги предаде дека зборувале македонски“, рече владиката Петар.
Преспанско-пелагониската епархија жестоко го осуди нападот врз отец Никодин Царкњас, кога грчки ученици ја каменуваа неговата куќа во С’ботско, како и обидот на црквата „Св. Злата Мегленска“, каде што богослужи архимандритот, да постават грчко знаме. „Нападот врз отец Царкњас го квалификуваме како најбрутален однос не толку спрема него како човек и свештеник, туку спрема неговата припадност како Македонец и како човек кој, всушност, се залага македонско малцинство во Егејскиот дел на Македонија да може да ги изразува своите верски чувства на мајчин македонски јазик“, истакна митрополитот Петар на завчерашниот прес во битолската митрополија, од каде што го упати Велигденското послание.
Коментирајќи го новиот Закон за верски заедници, тој рече дека оној што сака да регистрира своја црква во Македонија, ќе мора да дозволи и МПЦ да има легална црква во таа држава. „Ако некој сака друга црква да регистрира тука, било да е бугарска, грчка, албанска, тоа може да се уреди само со начин на реципроцитет, и ние да можеме да регистрираме наша црква во нивната земја“, предочи тој. (Б.А.) |
