Германска донација за Домот „11 Октомври“
Градот Скопје доби донација вредна 15.000 евра од збратимениот град Нирнберг. Помошта ќе биде наменета за реновирање на тоалетите во Домот за деца без родители „11 Октомври“. Заменик-градоначалникот на Нирнберг, Хорст Фертер, и директорот на фирмата за санитарии „Хајнце“, Кристијан Рацбергер, деновиве официјално на Градот му ја предадоа донацијата што се состои од клозетски шолји, лавабоа и арматури што ќе се поставуваат во домот.
Градските власти информираат дека покрај помошта во санитарии, доделени се и пакети со играчки и со слатки, исто така наменети за штитениците од овој дом. Оваа донација е една од многуте кои Скопје ги има добиено во изминативе 26 години колку што трае соработката со збратимениот Нирнберг. (Сн.К.) |
