Голем интерес за дивоградбите

Гостивар - Секторот за урбанизам на Општина Гостивар интензивно работи на решавање на предметите за легализација на диво изградените објекти. Деновиве е значително зголемен бројот на доставените барања, особено со доаѓањето на печалбарите од странство кои летниот одмор го поминуваат во родниот крај.

„Поради големиот интерес за легализација на бесправно изградените објекти, Секторот работи турбо, со цел да им излезе во пресрет на сите барања“, изјави Беким Алиу, раководител на Секторот за урбанизам во Општина Гостивар.

Инаку, досега се поднесени околу 1.000 барања за легализација, а овој број секојдневно се зголемува за околу 50-ина. Досега 124 граѓани добиле правосилни решенија, а уште 125 барања се решени и се очекува подносителите да ја извршат уплатата и да ги добијат решенијата.

Членовите на Комисијата за мерење и процена на објектите постојано се на терен и интензивно работат на утврдување на фактичката состојба и засега не се соочуваат со никаков проблем.

Во Секторот за урбанизам очекуваат дека до 3 септември годинава, кога е последниот рок за поднесување барање за легализација, околу 90 отсто од сопствениците кои имаат бесправно изградени објекти ќе аплицираат за легализирање на дивоградбите. (К.К.)