МВР и ЕВН во акција за откривање кражба на струја

Министерството за внатрешни работи, во координација и по пријава за нанесена штета од „ЕВН Македонија“ откри и санкционираше девет лица осомничени за кражба на електрична енергија. Поднесени се осум кривични пријави против девет осомничени лица на возраст од 27 до 61 година, од повеќе скопски населби, за кривично дело кражба, со што и' направиле штета на ЕВН што се проценува на еден милион денари. Според портпаролот на МВР, Иво Котевски, како што се претпоставува од документираните сознанија, од почетокот на 2011 година осомничените извршиле кражби на струја со неовластено отворање на електричните броила и ги оневозможувале да ја регистрираат вкупно потрошената енергија. Тој посочи дека станува збор за кривично дело за кое е предвидена и казна затвор од три години. Ленче Карпузовска, раководителка на Секторот за комуникации во „ЕВН Македонија“, потенцира дека од овој вид кражби компанијата трпи милионски загуби во евра на годишно ниво.

„Досега имало секакви случаи од физички напади и друг вид отпор“, изјави Карпузовска и додаде дека имало многу кривични пријави и во минатото.

Акцијата е спроведена на подрачјето на Скопје, но од МВР најавуваат дека со засилено темпо ќе биде реализирана на цела територија на Македонија. (МИА)