Пациентите ќе го спасуваат Фондот од банкрот

Снежана Калабакова

По најновиот законски „упад“ во последната одлука на Уставен суд, која е трета едноподруго за истата работа, македонските граѓани ќе се лекуваат со сини картони само во приватните клиники што склучиле договор со Фондот за здравство. Државата повторно им диктира на граѓаните кому да му го доверат своето здравје, а целта и' е да го спаси Фондот од банкрот.

Последните измени на Законот за здравство што беа донесени во минатиот четврток, ги направи пациентите жртви за спас на фондовската каса. Со нив уште еднаш е ограничено нивното загарантирано уставно право на лекување, бидејќи сега тие повторно не можат слободно да одлучуваат каде ќе се лекуваат. Оние, пак, што ќе решат да се лекуваат во приватни установи што немаат договор со Фондот за здравство, не ќе можат да се надеваат на рефундирање на дел од парите што ги потрошиле за лекување.

Пациентите се револтирани и се чувствуваат измамени, бидејќи не можат да си ги остварат правата од здравствената заштита што претходно им беа дадени со одлуката на Уставен суд, сините картони да им важат и во приватните клиники. Многумина сега си го поставуваат прашањето дали постои правна сигурност и владеење на правото, бидејќи ова право им го даде Уставен суд, а сега им се одзема со измените на Законот за здравство.

Здравствените власти завчера сами признаа дека ако и натаму Фондот продолжел да ги опслужува пациентите што навалија за здравствени услуги со сини картони во приватните здравствени установи, а кои немале склучен договор, Фондот ќе банкротирал. Над триста пациенти месечно што користеле најразлични услуги од приватните болници, барале враќање на парите што ги потрошиле за лекување.

Министерот за здравство, Бујар Османи, нагласи дека за неколку месеци Фондот би банкротирал, но призна дека обврска на Владата е да го заштити пациентот и системот од колапс. Особено затоа што за него е нелогично Фондот да одржува 113 јавни установи, со плати, опрема и материјални трошоци, а паралелно да издвојува и за трошоците за плаќање услуги во приватните здравствени установи. Пратеникот од СДСМ, Андреј Петров вели дека не може Владата да покажува загриженост за здравството, а да не и' е гајле за пациентите.

„Здравството е уништено и големи средства се одлеани за вработување партиски кадри, а буџетот од 300 милиони евра е најмал во однос на земјите од регионот.

Здравствениот систем е тотално колабиран, средствата од Фондот се потрошени, а Владата ја фаќа паника и купува време да прикаже дека некој друг и' е виновен“, додава тој.

„Освен одлуката донесена во јануари оваа година, Уставен суд има уште две други одлуки од 2006 и од 2009 година, кои се однесуваа на правото на пациентите да се лекуваат со сини картони и во приватните клиники. Првата и последната одлука беа интервентни, а средната со правно дејство за неповедување постапка. Со двете интервентни одлуки се потврдува уставното право на граѓаните кому ќе ја доверат грижата за сопственото здравје. Ако сега некој смета дека со измените на Законот за здравство се кршат одлуките на Уставен суд, треба да поведе постапка и Судот ќе го преиспита тоа и ќе се произнесе“, вели Југослав Миленковиќ, портпарол на Уставен суд.