Споменикот ќе се врати на плоштадот, ветува градоначалникот Панов

КАВАДАРЦИ - Боречката организација од Кавадарци не се спротивставува на потегот на локалната самоуправа за привремено отстранување на споменикот на револуцијата додека се изведуваат градежните зафати за реконструкција на плоштадот. Градоначалникот на Кавадарци нагласува дека ова е прва планска реконструкција на централниот дел и ветува дека споменикот ќе се врати на плоштадот, на нов постамент.

Во вчерашното писмено обраќање до граѓаните првиот човек на Кавадарци, Александар Панов, вели дека доколку споменикот не се вклопува во архитектонското решение ќе бараат од борците дозвола за преместување од неколку метри.

„Споменикот, дело на големиот скулптор Пјетро Палавичини, е поставен во 1948 година. Такво ремек-дело ниту сакам ниту смеам да отстранам од плоштадот. Барам само малку трпение. Во јули ќе имате можност да прошетате по новиот градски плоштад, со целосно хортикултурно уредување“, напишал градоначалникот Панов. Тој вели дека обраќањето го посветува на „душегрижниците што се обидуваат да добијат евтини политички поени и замолува да престане ширењето на непроверени информации“. (А.Д.)