Загина 22-годишно момче во Струмица

Дваесет и две годишниот Дејан Василев загина, а неговиот сопатник е повреден во сообраќајната несреќа што се случи завчера во попладневните часови на булеварот ,,Маршал Тито“ во Струмица.

До несреќата дошло кога мотоциклот „сузуки“, со кој управувал Василев, ја изгубил контролата по ударот со автомобилот „мерцедес“, кој се приклучувал на булеварот од споредна улица. Од ударот момчето и неговиот сопатник паднале на коловозот, а мотоциклот продолжил неконтролирано да се лизга уште двесте метри и удрил во паркирано возило на булеварот.

Василев веднаш бил пренесен во Медицинскиот центар во Струмица, но по кратко време, им подлегнал на повредите. Жителите што живеат во овој дел на градот велат дека сообраќајните несреќи на булеварот, особено на оваа раскрсница се честа појава, бидејќи се вози со голема брзина. Тие апелираат до надлежните да преземат мерки за заштита и на возачите и на пешаците. (Е.П.)