Судството и медиумите недоволно соработуваат

Во организација на Академијата за судии и јавни обвинители на Република Македонија и со поддршка од Германската фондација за меѓународна правна соработка (ИРЗ-фондација) вчера се одржа семинар на тема „Право за слобода на информирање“.

„Во овој момент впечаток е дека недоволно соработуваме едни со други. Ако недоволно соработуваме значи дека и недоволни информации се прелеваат од една страна на друга или тие се прелеваат на начин што не ги задоволува интересите на судството“, изјави Николчо Николовски, судија на Врховен суд и претседател на Здружението на судии на Република Македонија.

Според него, правото на слободно информирање, само по себе, треба да изгради релација меѓу судовите и новинарите, која ќе овозможи во јавноста да се слушне за состојбите во судството на, како што рече, многу пообјективен и реален начин.

Николовски рече дека секој новинар што пристапува во разговор или во коментар на судска одлука или во некој контекст го конотира судството и судската фела мора да биде компетентен за тоа. Судијата и директор на Академијата за судии и јавни обвинители, Анета Арнаудовска, изрази надеж дека соработката ќе биде добра и конструктивна со цел, како што рече, да се подобрат односите меѓу судството и медиумите.

Насер Селмани, претседател на Здружението на новинари, рече дека новинарите се незадоволни од соработката со судството.

Според него, соработката меѓу медиумите и судството треба да се заснова врз процена што заеднички ќе се направи, врз база на почитување на слободата на говорот, а посебно колку судовите го почитуваат Законот за слободен пристап до информации од јавен карактер. (П.Р.)