Прилепските земјоделци ја блокираа депонијата во Алинци
ПРИЛЕП - Земјоделци од селата Алинци, Загорани, Кадино Село и Веселчани, вчера со механизација ја блокираа градската депонија, бидејќи цела година не им се исплатени пет милиони денари за штетите од невремето во 2007година.
"Никола Груевски и Силвана Бонева лани во август ветија пари. Пред вонредните избори тврдеа дека парите се пуштени, а ние денар не сме зеле. Секое семејство просечно треба да добие по 1.000 евра, бидејќи цел род беше уништен", вели Никола Мирчески од Алинци.
Земјоделците реагираат и затоа што локалната самоуправа не презела мерки да ги реши проблемите со депонијата:
"Нема да дозволиме да се истура отпадот се' додека не ги исполнат нашите барања. Депонијата ја загадува животната средина, нечистотијата ја внесуваме дома, дишеме нечист воздух. Ни ги зедоа нивите, а никој не ни даде друго земјиште. Немаме чисти пасишта за стоката, а ни наплаќаат пашарина. Постојано само ветуваат, а од ветувањата ништо", се жали локалното население. Од "Комуналец" велат дека ќе бараат алтернативни решенија ако протестот продолжи. "Чекаме да го одблокираат патот, бидејќи дневно носиме 80 тони отпад. Ќе работиме и попладне, но ако не се повлечат, ќе бараме друго решение", вели Златко Ристески, директор на ЈКП "Комуналец". Локалната самоуправа најавува дека земјоделците ќе ги добијат парите за отштета в среда. (Мн.Т.) |
