Нудел работа во Дубаи, па збришал со парите

Полицијата поднесе кривична пријава за измама против босанскиот државјанин Д.Ч. (47), кој е во бегство и за кумановката И.П. (25). Според МВР, Д.Ч., кој бил управител на фирмата „Нахил инвест“ од Скопје и И.П., која била менаџер на фирмата, измамиле 13 граѓани дека ќе им најдат работа во Дубаи, а, всушност, им ги зеле парите (околу 234,500 денари) што ги уплаќале тие.

Според истрагата, осомничените во мај годинава на Интернет-страница објавиле информација дека фирмата нуди работа за градежништво, архитектура и хотелски работници во Дубаи. Менаџерката закажувала интервјуа со заинтересираните во просториите на фирмата каде што им објаснувала дека станува збор за двегодишна работа што започнувала на 16 август годинава. Откако споменатиот датум поминал, граѓаните сфатиле дека се оштетени и побарале помош во полицијата.

„Одземени се 437 договори за работа склучени меѓу ‘Нахил‘ и граѓани од земјава. Утврдено е дека на сметката на фирмата, во текот на 2010 година, уплатени се околу 7.4 милиони денари“, ��елат од МВР.

Босанскиот државјанин е во бегство, додека кумановката била сослушана и сега се очекуваат инструкциите на Јавното обвинителство. „МВР им стои на располагање и на останатите граѓани, кои во наредниот период би одлучиле да пријават штета од склучените договори“, се наведува во соопштението на полицијата. (Г.А.)