Бугарија бара целосна истрага за трагедијата во Охрид

Бугарија ja откажа прославата на Денот на обединувањето за да им оддаде почит на жртвите

Денешниот ден ќе биде прогласен за ден жалост во Бугарија. Тоа го соопшти бугарскиот премиер Бојко Борисов на специјална прес-конференција во саботата ноќта. Денеска и во бугарската амбасада во Скопје ќе биде отворена Книга на жалост. Бугарија ги откажа сите свечености по повод прославата на Денот на обединувањето, 6 септември. Борисов соопшти дека се идентификувани 11 тела од вкупно 15 загинати. Тој изрази убеденост дека македонските власти ќе сторат се' што е потребно да ги казнат оние што се виновни за несреќата.

„Виновниците сигурно ќе бидат пронајдени. Знам дека има уапсени, знам дека министри поднесоа оставки во Македонија. Но, повторно, и по овој случај се засрамени, како и за Спаска“, рече Борисов.

Бугарската агенција БТА јави дека во саботата ноќта со авионот на бугарската влада „Ту-154“ биле пренесени од Охрид во Софија 38 преживеани бугарски туристи од вкупно 40. Оттаму тие ќе бидат вратени во нивните места Пирдоп, Златица, Челопек, Антон и Мирково. Во Охрид биле оставени само туристичкиот водач и возачот на автобусот, со кој туристите пристигнале во македонскиот град. На аеродромот преживеаните ги пречекал премиерот Бојко Борисов.

По наредба на бугарскиот министер за транспорт, Александар Цветков, тричлена екипа отпатува на местото на инцидентот во Охрид, за да се вклучи во истражувањето на фактите и на околностите, кои доведоа до трагичниот инцидент со потонувањето на бродот „Илинден“, соопшти прес-службата на бугарското министерство за транспорт.

Бугарските експерти се од дирекцијата за истрага на несреќи при министерството, а ги предводи Атанас Костов, јави бугарската новинска агенција БТА. Тие ќе учествуваат во сите нивоа на истрагата се' до разјаснувањето на случајот.

Нема податоци дека фирмата „Фара тур“, која ја организирала екскурзијата во Охрид, е соодветно регистрирана, изјавил бугарскиот министер за внатрешни работи, Цветан Цветанов.

Како што јави новинската агенција БТА, тоа важи и за фирмата „Клјунчев“ ЛТД, која го организирала превозот на Бугарите до Македонија. Таа немала лиценца за организирање тури во странство, туку била регистрирана како транспортна фирма во Димитровград.

Претседателот Георги Прванов присуствуваше на погребна молитва во катедралниот храм „Света Богородица“, отслужена во сеќавање на паднатите во борбата за обединувањето на Бугарија и на бугарските граѓани, кои загинаа во вчерашната несреќа во Охридското Езеро, јави бугарската новинска агенција БТА. Прванов изразил задоволство што на местото на трагедијата брзо дошла речиси половина Влада на Македонија.

Прванов потврдил дека има договор со македонските власти за паралелна истрага за причините ��а инцидентот и од бугарска страна. Од денеска Македонија е подготвена да прими и бугарски експерти, затоа што, според зборовите на претседателот, во првите денови ќе се работи под вода за вадење на бродот, јави БТА.

Според Прванов, ќе се бараат одговори на прашања зошто е дозволена употреба на стари бродови и преоптовареност. Прванов сметал дека тие прашања се дел од околностите што довеле до трагичниот инцидент.

Бугарскиот весник „Стандард“ и агенцијата „Новините“ пренесуваа изјави на преживеани. Еден сведочи како сите патници паднале во водата. „Само неколку знаеја да пливаат. Тие што не пливаа се фаќаа за делови од штици или од бродот. Многумина врискаа од ужас“, вели преживеаниот.

Во сторијата на агенцијата „Новините“ преживеан патник вели дека на бродот немало заштитни елеци. Тој не знаел да плива, но се спасил држејќи се за некое дрво додека жена му и три други жени се држеле за една гума за пливање. Тие допливале до него и се фатил за гумата. Патникот цело време држел и друга жена која не знаела да плива и би се удавила.

Бугарската агенција „Фокус“ јави дека потонатиот брод најверојатно ќе остане под вода уште неколку дена додека биде детаљно истражен. Агенцијата ја пренесе вчера и изјавата на градоначалникот на Охрид, Александар Петревски, дека „цел Охрид жали за трагедијата“.

Бугарската национална телевизија јави дека осум од 15 жртви се од селото Антон. Една од жртвите заминала во Охрид да го слави 63. роденден. Сопругот жали што ја пуштил на тоа патување. Весникот „Дневник“ објави дека семејствата на жртвите ќе добијат по десет илјади лева обесштетување од државата. „Дневник“ јави и за оставката на министерот за транспорт и врски на Македонија, Миле Јанакиески. Сите бугарски медиуми вчера ги објавија имињата на загинатите во потонатиот брод.

Медиумите од светот, сите до еден, известуваа за трагедијата, почнувајќи од Еуроњуз кои први ја дадоа веста, па се' до Си-Ен-Ен, Би-Би-Си, „Вол стрит џорнал“...

Писма со сочувство до бугарските власти пристигнаа од сите соседни земји, Македонија, Србија, Хрватска, а со специјална изјава за жалење за трагичниот настан се огласи и високиот претставник на ЕУ за надворешна и безбедносна политика, Хавиер Солана. Грчката министерка за надворешни работи, Дора Бакојани, со писмо до македонскиот колега, Антонио Милошоски, и до бугарскиот колега изрази жалење за случајот.

И на крај еден куриозитет. „Трагедијата на Охридското Езеро, во која загинаа 15 бугарски државјани, е божја казна“, изјави митрополитот пловдивски на Бугарската православна црква, Николај. Тој во храмот „Света Богородица“ рече дека на 29 август повеќе пати повикувал да биде откажан концертот на пејачката Мадона. Митрополитот Николај вели дека на тој ден била отсечена главата на Јован Крстител и одржувањето концерти и други големи настани не било во духот на христијанската традиција. (С.К.)