Црно лето на Охридското Езеро

Трагедии, инциденти и неколку давења ја обележаа годинашната туристичка сезона

Даниела Трпчевска

Трагедии, инциденти со скутери, кобна несреќа со глисери и неколкумина давеници ја обележаа овогодишната летна сезона на Охридското Езеро. Со последната трагедија во која животот го загубија 15 туристи од Бугарија, кои се удавија при потонувањето на бродот „Илинден“ кај кампот Елешец, црниот биланс од овогодишната летна сезона се искачи на 20 лица. Охриѓани велат дека не паметат вакво кобно лето досега, во кое несреќи станаа секојдневие, а стравувањето, а безбедноста на капачите и туристите од ден на ден е се поголемо.

Потонувањето на бродот „Илинден“ кој 19 години безбедно пловел по водите на Охридското Езеро е најголемата водена трагедија што се памети во земјава.

Трагедијата кај Елешец се случува само неколку недели по страшната несреќа кај каналот Студенчишта, кога со судир на два глисера загина скопјанката Ирина Романова-Муцунска. Ужасниот судир, за кој со денови се зборуваше по јавноста, се случи пред две недели, во вечерните часови, додека Ирина се доближувала до каналот Студенчишта, каде планирала да го паркира глисерот. Одеднаш во неа силно удрил глисерот кој го управувал Христијан Шапкар, а со него биле и неговата сопруга Ивана и уште две лица. Анализите покажаа дека шапкар го управувал глисерот под дејство на алкохол, а истражен судија во одреди 30-дневен притвор.

Несреќата се случи само неколку дена откако беше укината забраната за управување со скутери по водите на Охридското Езеро во време на летната сезона, особено во периодот од 11 до 18 часот кога има најголем број капачи.

Ваквите безбедносни мерки беа преземени поради бројните предупредувања на капачите и концесионерите на плажите дека не можат да куртулат од „бесните“ возачи на глисери и скутери кои се доближуваат до брегот и ја загрозуваат безбедноста на туристите. Охридската капетанија иако тврдеше дека се вршат редовни контроли, јавноста не дозна дали некој е казнет поради бесното возење на скутери или пак дали некому му е одземена дозволата поради несовесното возење.

Трагедиите во Охрид започнаа со самиот старт на сезоната, кога на плажата кај хотелот Силекс се удавија две момчиња возејќи се на педалинка. Неколку дена потоа српски каратист почина од срцев удар на плажа во Далјан, на плажата Лагадин се удави возрасен маж, а момче беше пронајдено мртво на плажата Градиште. Во црниот биланс на охридската ривиера ова лето можат да се вбројат и двете несреќи на странски параглајдеристи кои при слетување од Галичица повредија дете кај автокампот „Љубаништа“.

Дали се врши контрола на пловните објекти, дали се почитуваат правилата за издавање на дозволи, води ли сметка некој за безбедноста на патниците и кој ги проверува бродовите дали имаат противпожарни апарати и елеци за спасување во случај на несреќа, се ��амо дел од дилемите кои излегоа на површина по многубројните несреќи. Медиумите во повеќе наврати бараа одговор на овие прашања, но ниту се лоцираше одговорноста за ваквите несреќи, ниту пак беа преземени соодветни мерки за тие да се избегнат во иднина.

И покрај многубројните укажувања дека владее хаос во охридската марина, која е пребукирана од пловни објекти. Во сезона, во каналот е Студенчишта е вистинска врволица, ако се има предвид дека во Охрид има регистрирани од 2.500 до 3.000 чамци. Само од почетокот на годинава има 141 новорегистриран чамец, а најмалку 250 нови глисери биле увезени годинава од странство.

Речиси единствената мерка која што беше преземена за да се скротат бесните скутерџии, беше забраната за нивно возење во периодот од 11 до 18 часот во екот на сезоната, кога езерото беше преполно со капачи. Но, и оваа мерка се покажа како недоволна, оти само неколку недели по нејзиното укинување се случи страотната глисерска несреќа кај плажата Куба Либре.

Одговорност за многубројните несреќи во Охридското Езеро ова лето, до сега не понесе никој. Одговорноста за тоа што се случува во езерото е во директни раце на охридската капетанија, која ги издава дозволите и треба да врши контрола над пловните објекти, како и на езерската полиција, која е надлежна да патролира по езерото и да реагира во случај на инциденти и неодговорно однесување.

Како морален чин, оставка за трагедијата во Охрид понесе само министерот за транспорт и врски, Миле Јанакиески, по последната голема трагедија која однесе 15 животи на бугарски туристи во земјава. Јавноста очекува премиерот Никола Груевски да ја прифати оставката на министерот Јанакиески.

Проблемите со пребукираната марина, хаосот во езерските води, непочитувањето на правилата, дивеењето на несовесните скутерџии се проблеми кои со години наназад се провлекуваат на најпознатото македонско летувалиште. Ниту локалната самоуправа, ниту надлежните институции не изнајдоа соодветно решение за нив.