Во Прилепско тече ликовната колонија „Дрен 2008“

Од денеска, па во следните пет дена во манастирскиот комплекс „Свети Илија“ во прилепското село Дрен, 13 уметници од земјава, Бугарија и од Полска ќе творат во креативна атмосфера, во рамките на традиционалната трета по ред, сликарска колонија „Дрен 2008“ што ја организира Центарот за култура „Ма��ко Цепенков“ од Прилеп.

„Овде уметниците ќе творат во еден вистински уметнички, креативен амбиент ослободен од допирот на јавноста. Девет дена тие ќе бидат посветени исклучиво на уметноста и на сите задоволства кои еден уметник ги открива секогаш повторно во својот творечки занес“-изјави Тони Чатлески, директор на Центарот и идеен творец на манифестацијата.

Сликарската колонија изминативе две години брои 70 дела, работени во техника масло на платно, кои се веќе изложени во фоајето на Центарот за култура во Прилеп. Најчест мотив на сликарите се прекрасните пејзажи околу манастирот „Свети Илија“.

„Изложбата сама по себе говори за една фантастична шареноликост на ликовни изрази кои ја имаат истата цел, истата насока, истиот извор, но имаат различен ракопис. Тоа е многу добро, зашто уметниците не може да се ограничат, уметникот може да твори само доколку се чувствува слободен“-истакнува Чатлески

Тој додава дека следната година се планира проширување на манифестацијата со нови содржини, затоа е подготвен проект со кој ќе се аплицира во ресорното министерство.

„Планираме манифестацијата, која станува бренд на Прилеп, да прерасне во сликарско-графичка колонија каква што досега нема во државата“- вели Чатлески. (М.Т.)